Sheteldegi qazaqtarǵa jáne qazaq tilin úırenemin degen sheteldikterge onlaın tegin kýrstary qyrkúıekte qaıta ashyldy.
Bul joba «Otandastar» qorynyń qoldaýymen 2019 jyly qolǵa alynǵan. Osy ýaqyt aralyǵynda 300-ge tarta azamat tildi meńgergeni týraly sertıfıkattaryn alǵan, dep habarlaıdy Almaty-akshamy.kz Qazaqtv.com saıtyna silteme jasap.
Qor ókiliniń aıtýynsha, onlaın kýrstarǵa jazylýshylardyń sany jyl saıyn artyp keledi. Mysaly, bıyl kýrsqa 900-ge jýyq sheteldegi qandas pen qyzyǵýshylyq bildirgen ózge ult ókilderi ótinish bergen. Aıta keteıik, qazirgi tańda qazaq tili - aǵylshyn, orys, túrik jáne parsy tilderin biletinderge oqytylýda.
«A1,A2, B1 deńgelerinde, ıaǵnı deńgeı boıynsha ótkiziledi onyń barlyǵy. Bizde qatysýshylar kóbinese Reseı elinen, Túrkıa, Eýropa jáne Amerıkada, Dımashtyń Dears-tary da bar. Kýrstardyń bir ereksheligi ár eldiń ýaqytysyna yńǵaıly etip jasalǵan. Endi osy kýrstardyń aıasynda balalarǵa arnalǵan ártúrli shyǵarmashylyq baıqaýlar ótip jatady. Sonymen qatar, aldaǵy ýaqytta «Dostar alańy» balalarǵa arnalǵan joba bastalady. Ol jaıly «Otandastar» qorynyń áleýmettik jelilerinde, saıttarynda tolyq aqparat jarıalanady», - deıdi «Otandastar» qorynyń sheteldegi qandastardy qoldaý departamentiniń menedjeri Eńlik Berdirahmanova.