Qazaqstannyń fýtboldan U-17 quramasy Mınsk (Belarýs) qalasynda ótip jatqan Damý kýbogynda qatarynan ekinshi oıynda jeńiske jetti.
Bizdiń komanda ekinshi aınalymda Ózbekstan quramasymen kezdesip, 3:0 esebimen utty, dep habarlaıdy Almaty-akshamy.kz.
Oıynnyń onynshy mınýtynda quramanyń jartylaı qorǵaýshysy İlıas Ábil esep ashty. Araǵa týra on mınýt salyp shabýylshy Tamerlan Aǵymanov esepti eseleı tústi.
Machtyń sońǵy mınýtynda ekinshi taımda alańǵa shyqqan Vıktor Lakeev úshinshi goldy soǵyp, kezdesýge núkte qoıdy.
Qazaqstan quramasynyń sapynan İlıas Ábil machtyń úzdik oıynshysy bolyp tanyldy.
Aleksandr Kýznesov baptaıtyn qazaqstandyq komanda toptyq kezeńniń sheshýshi oıynyn 9 aqpan kúni elorda ýaqytymen 21:00-de Belarýs quramasyna qarsy ótkizedi.