Qazaqstan Fransıanyń Ortalyq Azıadaǵy basty ekonomıkalyq seriktesi.
Bıyl Qazaqstan men Fransıanyń arasyndaǵy strategıalyq áriptestiktiń qurylǵanyna 15 jyl toldy, dep habarlaıdy Almaty-akshamy.kz
Eki memlekettiń ózara yntymaqtastyǵynyń qarqyny taraptardyń jemisti qarym-qatynasty odan ary damytýǵa múddeli ekenin baıqatyp otyr.
Óz kezeginde atalǵan eýropalyq memleket elimizdiń ulttyq ekonomıkasyna ınvestısıa salyp kele jatqan jetekshi ınvestorlardyń qatarynda. Qazir kólik sektorynda, onyń ishinde temirjol kóligi jáne avtotasymal salasynda, sondaı-aq azamattyq avıasıa jáne ónerkásip baǵytynda ekijaqty tıimdi baılanys jolǵa qoıylǵan.
Máselen, temirjol kóligi salasyndaǵy áriptestikke kelsek, byltyr ekijaqty eksport-ımporttyń kólemi 1,5 myń tonnaǵa jetti. 2022 jyldyń qorytyndysy boıynsha Fransıadan QR aýmaǵy arqyly júkterdiń tranzıtti tasymaly 4028,7 tonna kóleminde baıqaldy. Bul 2021 jylmen salystyrǵanda 3 esegekóp. Tasymaldanatyn negizgi júkterdiń arasynda mashınalar, qural-jabdyqtar, qara jáne tústi metaldar, daıyn tamaq ónimderi jáne t.b. bar.
Qazir Qazaqstanda fransıalyq kapıtaldyń qatysýymen 170-ten astam kompanıa jumys istep keledi. Olar ýrannan bastap ǵarysh ónerkásibine deıin túrli salalarda qyzmet kórsetip jatyr. Bul óz kezeginde otandyq ekonomıkany ártaraptandyrýǵa oń yqpal etip keledi.
Azamattyq avıasıa baǵytyndaǵy qarym-qatynasqa toqtalsaq, atalǵan elderdiń avıasıalyq bılikteri ózara túsinistik týraly memorandýmǵa qol qoıyp, onyń aıasynda eki jaqtan belgilengen avıatasymaldaýshylar aptasyna 3 retjıiligimen memleketter arasynda turaqty reısterdi oryndaýǵa quqyly.
Tutastaı alǵanda, taraptardyń ıntegrasıalyq prosesterdi kúsheıtýge baılanysty jospary 2030 jylǵa deıingi Qazaqstan – Fransıa saýda-ekonomıkalyq yntymaqtastyǵynyń Jol kartasynda qarastyrylǵan. Bul oraıda byltyr qańtarda ózara senimdi dıplomatıalyq qatynastyń 30 jyldyǵy atap ótilgenin aıta ketken oryndy. Al bıyl mamyrda ótkizilgen ekonomıkalyq máseleler jónindegi Qazaqstan – Fransıa úkimetaralyq komısıasynyń XV otyrysysaýda-ekonomıkalyq qatynastarǵa tyń serpin berdi.
Uzaq jyldan beri nátıjeli ári ónimdi baılanysty jolǵa qoıǵan strategıalyq seriktester bul baǵyttaǵy jumysty odan ary nyǵaıtýǵa múddeli.