WhatsApp messendjerinde Qazaqstanǵa 70 myń aýǵan azamaty keledi degen jalǵan aqparat tarap ketken edi.
Elimizdiń Syrtqy ister mınıstrligi Qazaqstanǵa aýǵan bosqyndarynyń keletini, olardyń Shymkent qalasy men Túrkistan oblysyna ornalasatyny týraly aqpardy teriske shyǵardy, dep habarlaıdy Almaty-akshamy.kz
Áleýmettik jelide «bosqyndardyń 500-i ushaqpen Shymkent áýejaıyna kelgen, taǵy 1500 adam aldaǵy ýaqytta keledi eken» degen qaýeset taraǵan.
«Bul aqparat shyndyqqa janaspaıdy», – dep jazylǵan vedomstvonyń baspasóz qyzmeti taratqan habarlamada.
Sonymen qatar, Memleket basshysynyń baspasóz hatshysy Berik Ýálıdiń FB paraqshasyndaǵy jazbasy da bul qaýesetti teriske shyǵardy.
«Prezıdent Aýǵanstan bosqyndary týraly sheshim qabyldaǵan joq. Buǵan qatysty taraǵan aqparat negizsiz. Dúnıejúzilik uıym basshylyǵy resmı ótinish bildirgen jaǵdaıda BUU qyzmetkerlerine ǵana kómek kórsetiletin bolady», -dep jazdy Prezıdenttiń baspasóz hatshysy.