Qysqametrajdy «Mereke» fılm-debúti kórermenderge keler jyldyń basynda jol tartady.
Qysqametrajdy kınokartına QR Mádenıet jáne sport mınıstriliginiń tapsyrysy boıynsha Ulttyq kınony memlekettik qoldaý ortalyǵynyń qoldaýymen «Qazaqfılm» kınostýdıasynda túsirildi. Fılm-debútyna bir apta ýaqyt ketti, dep habarlaıdy Almaty-akshamy.kz. Elorda.info silteme jasap.
Basty rólderdi tanymal akterler Dýlyǵa Aqmolda men Danıar Bektenov somdady. Jobaǵa 40-tan asa adam jumyldyryldy.
Kınostýdıanyń málimetinshe, qarapaıym oqıǵadan bastaý alatyn fılm adam bolmysyndaǵy kishkentaı fılosofıany qozǵaıdy. Basty keıipker 7 jasar Aıdar – jergilikti kásipker Sáken men úı sharýasyndaǵy áıel Álıanyń jalǵyz uly. Oqıǵa kórermenge adam onyń murasy emes, adam - jadymyzdaǵy jarqyn estelik, al balalyq shaq- eshqashan qaıtyp kelmeıtin kezeń ekenin jetkizedi.
Oqıǵa jelisi ómirdiń árbir sátterin, balalyq shaqtaǵy ǵajaıyp estelikterdi umyt qaldyratyn adam sanasy men oǵan qaıta aparar jol týrasynda órbigen.
«Kartına shaǵyn bolsa da, shamaly kúnniń ishinde komanda bir-birine úırenip qaldy, joba úshin jumyla at salysty. Árıne, proses barysynda keıbir kútpegen qıyndyqtar týyndap jatty, biraq túsirilimge keri áserin tıgizbedi. Biz úshin eń qıynǵa soqqany trassa boıyndaǵy sahnalardy túsirý boldy. Soǵan qaramastan, fılmniń qoıýshy-operatory Mırhat Chapaı «Qazaqfılmniń» komandasymen birlese jaqsy jumys atqardy dep oılaımyn. Bizdiń fılmde kúnniń batýy, atýy sıaqty rejımdegi sahnalar kóp, solardy túsirip úlgerý úshin, tártip óte qatań boldy. Óz basym úshin alǵash ret bala aktermen, úlken aktermen jumys jasaý jańa tájirıbe boldy. Dýlyǵa aǵanyń túsirilim alańynda kóp kómegi tıdi. Sońǵy kún basqa kúnderge qaraǵanda jeńil ótti. Bul kúni biz túsirilip úlgermeı qalǵan kadrlardy, fılmniń sújettik mańyzy bar sahnalaryn taspaladyq. Akterlyq quram bir-birine úırenisip ketken soń, kadrdaǵy kóńil-kúı shynaıy shyqty dep oılaımyn»,- dep bólisti fılmniń senarı avtory ári qoıýshy-rejısseri İńkár Kárim.
Rejıserdiń aıtýynsha, «Mereke» fılminiń senarıiniń alǵashqy nusqasy sál ózgeshe bolǵanymen, basty ıdeıa joǵalmaǵan. Jaqyn arada shyǵarmashylyq top kartınanyń montajdaý prosesine kirispek. «Mereke» debúttik fılmi 2022 jylǵy 7-11 maýsym aralyǵynda ótken Ulttyq kınony qoldaý memlekettik ortalyǵynyń kezekti pıchınginiń qorytyndysy boıynsha memlekettik qarjylandyrýǵa ıe boldy.