Osy arqyly polıseıler qaıǵyly oqıǵanyń aldyn alǵan.
7 qyrkúıekke qaraǵan túni Qarasaı aýdandyq PB PPR qyzmetkerleri júkti áıelge kómek kórsetti. Polısıa qyzmetkerleri tolǵaǵy qysqan áıeldi perzenthanaǵa barar jolda patrúldik kólikte bosandyryp aldy, dep habarlaıdy Almaty-akshamy.kz İİM ınternet resýrsyna silteme jasap.
«Oqıǵa Almaty-Boraldaı-Jibek joly avtojolynyń 16 shaqyrymynda oryn aldy. Er adam patrúldik polısıa qyzmetkerlerin toqtatyp, júkti áıelin aýrýhanaǵa jetkizýin ótingen. Jol boıynda áıeldi tolǵaq qatty qysyp, polısıa qyzmetkerleri ony bosandyryp alýǵa májbúr bolǵan. Alǵashqy kómek kórsetilgen soń, anasy men jańa týǵan sábı dereý aýrýhanaǵa jetkizilip, dárigerlerge tapsyryldy, – dep habarlady Almaty oblysy PD baspasóz qyzmeti.
Dárigerler tártip saqshylarynyń arqasynda qaıǵyly oqıǵanyń aldyn alynǵanyn habarlady. Jańa týǵan náresteniń ata-analary óz kezeginde polıseılerge jedeldik pen kómek úshin alǵys bildirdi.