Sháken Aımanov atyndaǵy «Qazaqfılm» kınostýdıasy Almaty qalasyndaǵy Rysqulov dańǵyly, 101B mekenjaıynda ornalasqan jer telimi men burynǵy «Qazkınoprokat» ǵımaratynyń satylǵany týraly qaýesetterdi joqqa shyǵardy, dep habarlaıdy aqshamnews.kz.
Kınostýdıanyń ókilderi Facebook paraqshasynda bul jer telimi men ǵımarattyń áli de stýdıanyń menshiginde ekenin jáne satýǵa jatpaıtynyn málimdedi.
Kınostýdıanyń málimetinshe, kórsetilgen aýmaqtaǵy ǵımarat apatty dep tanylǵan. Qaýipsizdikti qamtamasyz etý maqsatynda «Qazaqfılm» Almaty qalasy ákimdigi ókilderiniń qatysýymen keshendi saraptama uıymdastyrǵan.
«Mamandardyń qorytyndysy negizinde bul ǵımaratty qaýipsiz paıdalaný boıynsha odan ári sheshimder qabyldanady. Jer telimi men ǵımarat kesheni satyldy degen aqparat jalǵan. Bul jalǵan aqparatty taratýdy jalǵasa berse, sotqa júginý quqyǵymyzdy saqtaımyz», — delingen kınostýdıa málimdemesinde.
Sonymen qatar, «Qazaqfılm»ótkizý rejıminiń qatańdaýy týraly aqparatty joqqa shyǵardy. Qoldanystaǵy ótkizý júıesi qyzmetkerlerdiń qaýipsizdigin qamtamasyz etýge jáne stýdıa múlkiniń saqtalýyna baǵyttalǵan. Bul álemdegi barlyq kınostýdıalarda standartty tájirıbe.
«Mundaı sharalar kınostýdıalarda keńinen qabyldanǵan tájirıbe jáne urlyq, órt jáne basqa da oqıǵalardyń aldyn alý úshin qajet», — delingen habarlamada.