Mádenıet jáne aqparat mınıstri Aıda Balaeva "Qazaqfılm" kınostýdıasyna qatysty suraqtarǵa jaýap berdi, dep habarlaıdy aqshamnews.kz
«Qazaqfılmge» qarasty jerdiń satylýy jaıynda?
"Bul másele tóńiregindegi negizsiz qaýeset birjola toqtatylýy tıis. «Qazaqfılmge» tıesili jerler kınostýdıa ıeliginde qala beredi. Jer satylǵan joq jáne tek kınematografıa múddesi úshin paıdalanylýda", dedi mınıstr.
Kınostýdıany jóndeýge ınvestorlar qomaqty qarjy salýǵa daıyn ba?
"Bul aqparat qoǵamda keń tarap júr, alaıda mundaı málimdemelerdi qujattarmen nemese naqty kepildiktermen rastaı almaıtyn adamdar jasap otyr. Memleket, ıaǵnı Mádenıet jáne aqparat mınıstrligi naqty ınvestorlarmen jumys isteýge daıyn. Degenmen ázirge eshqandaı naqty usynys, birde-bir kepildik haty joq. Barlyǵy tek áńgime deńgeıinde", dep túsindirdi Aıda Balaeva.
"Qazaqfılm" elordaǵa kóshe me?
"Bul da eshqandaı negizi joq qaýeset. Qazirgi ýaqytta elordaǵa «Qazaqanımasıa» shyǵarmashylyq birlestigin kóshirý múmkindigi qarastyrylyp jatyr. Munda mańyzdy jaıt – «Qazaqanımasıa» óndiristik baza emes, anımasıalyq kontent jasaýǵa tapsyrystardy bóletin qurylym. Sondyqtan onyń Astanaǵa kóshýi salanyń jumysyna esh kedergi keltirmeıdi", dedi Balaeva.
Mınıstr keıingi bes jylda elimizde sapaly anımasıalyq fılmder túsirilmegenin atap ótti.
"Osyǵan baılanysty anımasıalyq ındýstrıany kreatıvti ındýstrıalar qorynyń aıasynda damytý oryndy bolmaq. Qor qurylymynda anımasıany damytýǵa baǵyttalǵan kreatıvti hab jasaqtalýda", deıdi mınıstr.