Abaı atyndaǵy Qazaq ulttyq pedagogıkalyq ýnıversıtetinde «Halyqaralyq «Qazaq tili» qoǵamy» qoǵamdyq birlestigi Almaty qalalyq fılıalynyń keńeıtilgen otyrysy ótti.
Jıyn barysynda memlekettik tildiń mártebesin arttyrý, onyń qoǵamdyq ómirdegi qoldanysyn keńeıtý máseleleri talqylandy.
Otyrysty Abaı ýnıversıtetiniń basshysy, «Halyqaralyq «Qazaq tili» qoǵamy» qoǵamdyq birlestigi Almaty qalalyq fılıalynyń tóraǵasy Bolat Tilep ashyp, qoǵamdyq birlestiktiń oblystyq jáne respýblıkalyq mańyzy bar qalalyq fılıaldar týraly erejesin talqylaýdan bastady. Sonymen qatar, qazaq tiliniń bolashaǵyna qatysty tolǵaqty pikirlerin ortaǵa salyp, ana tilimizge baılanysty jobalardy qaǵaz júzinde qaldyrmaı, endigi jerde naqty nátıjelerge jetkizetin isterdi qolǵa alý qajettigine toqtaldy.
– Fılıalymyzdyń búgingi otyrysy qazaq biliminiń qara shańyraǵy – Abaı atyndaǵy Qazaq ulttyq pedagogıkalyq ýnıversıtetinde ótýi jaıdan jaı emes. Sebebi, Hákim Abaıdyń esimin ıelengen oqý orny úshin memlekettik til árqashan basty nazarda turady. Qazaqtyń birtýar perzenti Ahmet Baıtursynuly alǵash sabaq bergen qasıetti ordamyzda ana tili óz tuǵyrynan túsken emes. Sondyqtan Almaty qalasy – ǵylym-bilim, mádenıet pen rýhanıattyń ortalyǵy desek, alyp shahardaǵy qazaq tiliniń bedeli men qoldanys aıasyn keńeıtý, memlekettik til saıasatyn úzdiksiz júrgizip otyrý ortaq múddemiz, – dedi Bolat Anapıauly.
Fılıal tóraǵasy qazaq tilin balabaqshadan bastap dáripteý mańyzdylyǵyn sóz etip, búldirshinderge qazaqsha anımasıalyq fılmderdi kóbirek usyný, «Qýyrshaq» teatryn mektepke deıingi mekemelerge tartý, mektepterde til saıasatyn kúsheıtý jóninde usynys bildirdi. Halyqaralyq «Qazaq tili» muryndyq bolyp otyrǵan kóptegen joba boıynsha jumys kestesin de usyndy. Bul jıylǵan til janashyrlary tarapynan qyzý qoldaý tapty.
Otyrysta sóz alǵan belgili qoǵam qaıratkeri Asyly Osman jańa serpin alǵan «Qazaq tili» qoǵamynyń jumysyna sáttilik tilep, memlekettik tildiń mártebesin kóterýde otbasy ınstıtýty rólin arttyrý qajettigin sóz etti. «Men ázirbaıjan qyzy bolǵandyqtan, ákemniń «úıde ana tilińde, túzde qazaq tilinde sóıle» degen ustanymymen óstim. Nege otbasylar óz balalaryna osyndaı talap qoımaıdy?! Ákemniń sol tárbıesinen jaman bolǵan joqpyn. Osy kúnge deıin meniń ómirim memlekettik tilmen bite qaınasyp keledi. Qazaq tiliniń óz tuǵyryna qonǵanynsha barymdy salamyn» degen sózi kókiregi oıaý talaı azamatqa oı salǵany anyq.
Budan ózge sóz alǵan Almaty qalasy ákiminiń Ádep jónindegi ýákili Mamaı Ahetov, «Memlekettik tildi damytý ınstıtýty» JSHS dırektory Bıjomart Qapalbekov, Halyqaralyq «Qazaq tili» qoǵamy Almaty qalalyq fılıaly tóraǵasynyń orynbasarlary Janatbek İshpekbaev, Nurbolat Narjanov, qoǵamnyń Alataý aýdanyndaǵy ókili Bolat Qurymbaev, t.b. azamattar qazaq tiliniń mártebesin aıǵaımen emes, naqty istermen kóterý jónindegi oılaryn ortaǵa saldy.
Keńeıtilgen otyrysta aýdan ákimderi jáne orynbasarlarynyń usynysymen qoǵam jumysyn jandandyrý úshin Almatynyń ár aýdanynan jaýapty tulǵalar bekitildi. Olardy Almaty qalasy Tilderdi damytý jáne onomastıka bóliminiń basshysy Baqyt Ábıiruly jeke-jeke tanystyryp, qalanyń 8 aýdanynda atqarylyp jatqan júıeli sharalar týraly aıtyp berdi.
Jıyn sońynda «Halyqaralyq «Qazaq tili» qoǵamy» qoǵamdyq birlestigi Almaty qalalyq fılıalynyń tóraǵasy Bolat Tilep qatysýshylardy memlekettik tildi damytýǵa qatysty naqty usynystardy jazbasha joldaýǵa shaqyryp, barsha azamattardy qoǵamdyq birlestik jumysyna jumyla úles qosýǵa úndedi.
Jumys qorytyndysy boıynsha til janashyrlary dástúrli túrde kezdesip, keshendi jumystardy birlese atqarýǵa ýaǵdalasty.