Qazaq qyzynyń aty ańyzǵa aınalǵan "Real Madrıdke" jumysqa ornalasýy ertegi sıaqty estilýi múmkin. Biraq Albına Býneskýdyń ómiri – ańyz emes, tabandylyqtyń nátıjesi. Pavlodarda qarapaıym mektepti bitirip, bolashaǵyn qarjy salasynda elestetken keıipker búginde álemdegi eń iri fýtbol klýbtarynyń birinde – "Real Madrıdtiń" stadıon marketıńi bóliminde jumys isteıdi. Aqshamnews.kz tilshisi "fýtbol jumaǵynda" jumys istep jatqan keıipkermen suhbattasty.
KIMEP-ten Kastıláǵa deıin
Albınanyń marketıńke degen mahabbaty alǵash KIMEP ýnıversıtetiniń aýdıtorıasynda oıanǵan. Ol bıznes-ákimshilik mamandyǵyna túsken soń, alǵashqy sabaqta-aq óz baǵytyn tapqanyn túsindi. Ýnıversıtetti 2012 jyly bitirgennen keıin, osy salada 13 jyl jumys istep keledi. Alǵashqy bes jyl – jaldamaly qyzmetker retinde, keıin jeke marketıń agenttigin ashyp, bızneske strategıa ázirleýmen aınalysady.
Sportqa degen qyzyǵýshylyǵy da kezdeısoq paıda bolmaǵan. Eki ret Sport Fest Astana kórmesin uıymdastyryp, sport salasyndaǵy áleýetti baıqaǵan Albına bir sátte sheshim qabyldaıdy: odan ári bilim alyp, sport marketıńke bet burýǵa sheshim qabyldaıdy. Bul maqsatta ol Astanadaǵy baspanasyn satyp, alǵan aqshany oqýyna quıyp, shetelde bilim alýǵa bel býady.
Real Madrid Universidad Europea – fýtbol armanynyń mekeni
Albına Real Madrid Universidad Europea ýnıversıtetine sport marketıńi boıynsha oqýǵa túsedi. Oqý barysynda tek fýtbol emes, tenıs, avtosport, marafon syndy túrli sport túrleriniń jobalaryna qatysady. "Puma", Davis Cup, BMW jáne Madrid Marathon sekildi alyptarmen jumys isteıdi.
"Oqý jyly bastalǵanda bizge úzdik tórt stýdentke "Real Madrıd" fýtbol klýbynda jumys isteý múmkindigi beriletini aıtyldy. Shynymdy aıtsam, úzdikter qataryna kirýdi maqsat etpedim, tek oqýdan lázzat aldym. Jyl aıaǵynda úzdik tórt stýdentti atady, men solardyń qatarynda boldym. Bul múmkindik úshin qatty qýandym", - deıdi ol.
Eshqandaı báseke maqsat etpeı, barynsha lázzatpen oqyǵan ol Bernabeý stadıonynyń marketıń bólimine tańdalady.
Bernabéu Stadium
Qazir Albına – stadıon marketıńiniń naqty qazanynda qaınap júrgen maman. Mach kúnderinen bólek, stadıonnyń ómiri tolassyz ekenin biledi. Konsertter, kórmeler, korporatıvtik sharalar – munyń bári qarjy kózine aınalýǵa tıis. Albına osy ekojúıeni damytýmen aınalysady. Jaqynda ǵana Nú-Iorkke baryp, tórt stadıondy zerttep kelgen. Endi alǵan bilimin "Real Madrıdtiń" paıdasyna jaratyp keledi.
"Real Madrıd" degende eń aldymen oıǵa keletin nárse – resýrstyń aýqymy. Mundaǵy joba, ıdeıa, adamdar sany men jahandyq aýqym - kez kelgen mamannyń kásibı armany. Alaıda mundaı brendte sheshim qabyldaý da ońaı emes – ár joba muqıat saralanyp, brendtiń qundylyqtaryna sáıkes kelýi tekseriledi", - deıdi Albına.
Keıipkerdiń aıtýynsha, sport - erler basym baǵyt. Biraq tendensıa ózgerip jatyr: bıyl alǵash ret ol oqıtyn topta qyzdar sany jigitterden asyp tústi. Demek, áıelder de sporttaǵy marketıńke qyzyǵýshylyq tanytyp jatyr.
"Bolashaǵymdy Qazaqstanda kóremin"
Albınanyń úlken maqsaty – alǵan bilim men tájirıbesin Qazaqstanǵa alyp kelý. Búginde elimizde sport nysandary kóptep salynyp jatqanymen, onyń kópshiligi durys paıdalanylmaıdy. Albına bul jaǵdaıdy ózgertýge atsalyspaq. Sport marketıńi salasynda otandyq mamandar az bolǵandyqtan, ol óz úlesin qosyp, salanyń damýyna serpin bergisi keledi.
"Real Madrıdtegi" jumys – Albına úshin mansap emes, erekshe tájirıbe. Onyń negizgi baǵyty – óziniń marketıń agenttigin sport salasyna baǵyttap, halyqaralyq deńgeıge shyǵarý. Armany – sport marketıńiniń qazaqstandyq mektebin qalyptastyrý.
Qorytyndylaı kele, Pavlodardan bastalǵan jol Santágo Bernabeýge deıin jetti. Bul – jaı oqıǵa emes, tabandylyq pen izdenimpazdyqtyń kórinisi. Eń bastysy – ózińe sený, táýekel ete bilý jáne armannan bas tartpaý.