Sot qaýlysy zańdy kúshine endi.
«Maıqaıyńaltyn» AQ aýmaǵynda bolǵan apattan kóz jumǵan qutqarýshynyń jaqyndaryna tólenetin ótemaqy sot sheshimimen 4 ese qysqartyldy, dep habarlaıdy aqshamnews.kz
Bıyl 4 qańtarda atalmysh kompanıaǵa tıesili kenishtegi shuńqyrǵa avtobýs qulap, saldarynan 3 qutqarýshy men júrgizýshi qaza tapty. Olar Kásibı áskerılendirilgen avarıalyq-qutqarý qyzmetteriniń respýblıkalyq ortalyǵynyń qyzmetkerleri bolǵan.
Jazataıym oqıǵaǵa tekserý júrgizilip, onyń qorytyndysy boıynsha jumys berýshiniń kinási 100%, jumyskerlerdiń kinási 0% ekeni anyqtalǵan bolatyn. Bul rette qaza tapqan qutqarýshynyń jaqyndary kompanıa moraldyq zıandy óteýi kerek dep sotqa júgingen. Olar qaıǵyly oqıǵa kezinde jumys berýshi kóńil aıtpaǵanyn, qoldaý kórsetpegenin atap ótti.
5 qyrkúıekte Ekibastuz qalalyq soty talapty qanaǵattandyryp, «Kásibı áskerılendirilgen avarıalyq-qutqarý qyzmetteriniń respýblıkalyq ortalyq shtaby» JSHS-dan árqaısysyna moraldyq zıannyń ótemaqysy retinde 30 mln teńgeden jalpy 120 mln teńge qarajatty óndirý týraly sheshim shyǵardy. Pavlodar oblystyq sotynyń azamattyq ister jónindegi sot alqasynyń 13 qarashadaǵy qaýlysymen birinshi satydaǵy sottyń sheshimi ózgertilip, árqaısysynyń paıdasyna moraldyq shyǵyn kólemi 7 mln 500 myń teńgege deıin azaıtyldy.
Sot alqasy moraldyq zıannyń ótemaqy mólsherin anyqtaý kezinde birinshi satydaǵy sot eńbek qyzmetimen baılanysty óndiristegi jazataıym oqıǵa týraly aktini, jumys berýshiniń kinásin 100% anyqtaǵan jazataıym oqıǵanyń mán-jaıyn arnaıy tergep-tekserý aktisin basshylyqqa aldy.
Bul rette sot arnaıy tergep-tekserý aktisine sáıkes, jazataıym oqıǵanyń, eńbek qyzmetimen baılanysty Óndiristegi jazataıym oqıǵa týraly aktiniń sebepterin eskermegen. Atap aıtqanda:
«Maıqaıyńaltyn» AQ jaýapty qyzmetkerleri jumystyń qaýipsiz júrgizilýine óndiristik baqylaýdy jetkiliksiz júrgizip, jumysty tıiste deńgeıde uıymdastyrmaǵan;
bloktardy óndirý kezinde qazbalardan qulaý prosesi jetkiliksiz baqylanǵan;
II ken massasyn jáne taýdan joǵary jáne tómen +90 metr (160 metr) ken ornyn ıgerý kezinde taý-ken qondyrǵylaryn damytý jobalary bolmaǵan.
Iaǵnı, jazataıym oqıǵa «Maıqaıyńaltyn» AQ óndiristik qyzmetimen baılanysty. Bul mán-jaılardy sot moraldyq zıannyń ótemaqysy mólsherin anyqtaǵan kezde eskerýge tıis ekeni atap ótildi.
«Aqylǵa qonymdylyq, ádildik jáne jetkiliktilik krıterıılerin basshylyqqa ala otyryp, alqa bul jaǵdaıda jaýapkerden talap qoıýshylardyń paıdasyna týysynyń qaıtys bolýyna baılanysty keltirilgen moraldyq zıan ótemaqysyn árqaısysyna 7 500 000 teńgeden óndirý qajet degen qorytyndyǵa keldi», – delingen sot habarlamasynda.