Qatarda fýtboldan ótip jatqan álem chempıonatynda Anglıa men Fransıa jartylaı fınaldyń joldamasy úshin jasyl alańǵa shyqty, dep habarlaıdy Almaty-akshamy.kz Inform.kz-ke silteme jasap.
Aǵylshyndar 1996 jyly óz elinde ótken birinshilikte úzdik shyqsa, Fransıa 1998 jáne 2018 jyldary chempıon atanǵan bolatyn.
Mamandar bul machta favorıt retinde negizinen Fransıany ataǵanymen, qos komandanyń múmkindigi birdeı edi. Pleı-ofta Garet Saýtgeıt jattyqtyratyn aǵylshyndar Senegaldan ońaı ótti – 3:0. Dıde Deshamnyń shákirtteri de Polshany senimdi utty – 3:1.
Bul joly birinshi taımda 17-mınýtta Antýan Grızmannan pas alǵan 22 jastaǵy jartylaı qorǵaýshy Orelen Chýamenı alystan qaqpa buryshyn dál kózdep, Fransıany alǵa shyǵardy – 1:0. Bul onyń ulttyq qurama sapyndaǵy ekinshi goly edi.
Sodan keıin Fransıa sapynda 143-inshi machyn ótkizip, rekord ornatqan qurama kapıtany Ýgo Lorıs Harrı Keınniń qos birdeı soqqysyn toıtardy.
Ekinshi kezeńde Ý.Lorıs 19 jastaǵy Djýd Bellıngemniń gol soǵýyna múmkindik bergen joq. Áıtse de O.Chýamenı 52-mınýtta óz aıyp alańynda Býkaıo Sakany shalyp jyqty. Anglıa kapıtany Harrı Keın 54-mınýtta 11 metrlik núkteden múlt ketken joq – 1:1. Bir qyzyǵy, Ý.Lorıs pen H.Keın Anglıanyń «Tottenhem» klýbynda birge oınaıdy.
Aǵylshyn qaqpashysy Djordan Pıkford ta qarap qalmaı, áýeli Adrıen Rabonyń, sosyn Olıve Jırýdiń soqqysyn qaıtardy. Degenmen 78-mınýtta A.Grızmannan pas alǵan O.Jırý baspen qaqpany dál kózdedi – 2:1. Bul Antýannyń kezdesýdegi ekinshi nátıjeli pasy edi.
Brazılıalyq tóreshi Vılton Sampaıo Fransıa qorǵaýshysy Teo Ernandes alańǵa tyńnan qosylǵan Meıson Maýntty ıterip qulatty dep eseptep, 82-mınýtta ekinshi penaltıdi belgiledi. Alaıda H.Keın bul joly dopty aspanǵa tepti.
Osylaısha, Anglıany 2:1 esebimen súrindirgen Fransıa 14 jeltoqsan kúni fınalǵa shyǵý úshin Marokkomen talasady.