Prezıdent oǵan alǵys bildirdi.
Memleket basshysy Qasym-Jomart Toqaev Nazarbaev Ýnıversıtetiniń prezıdenti Shıgeo Katsýdy qabyldady, dep habarlaıdy Almaty-akshamy.kz Aqordaǵa silteme jasap.
Qasym-Jomart Toqaevqa Nazarbaev Ýnıversıtetiniń qazirgi jumystary men aldaǵy kezeńge arnalǵan jospary týraly baıandaldy.
Áńgimelesý barysynda bilim berý jáne ǵylymı-zertteý jumystarynyń perspektıvalaryna, túrli saladaǵy jańa tehnologıalar men ınovasıalardy ázirleý máselesine erekshe nazar aýdaryldy.
Shıgeo Katsýdyń aıtýynsha, Ýnıversıtet Qazaqstandaǵy joǵary bilim berý isiniń básekege qabilettiligin arttyrýǵa óz úlesin qosýǵa daıyn. Oqý ornynyń qyzmeti ulttyq ekonomıka men elimizdegi áleýmettik salany jańǵyrtýǵa baǵyttalǵan.
Memleket basshysy jýyq arada Nazarbaev Ýnıversıtetine barýǵa nıetti ekenin aıtty. Prezıdent Qasym-Jomart Toqaev Shıgeo Katsýdy 70 jasqa tolǵan mereıtoıymen quttyqtap, joǵary biliktiligi men Qazaqstannyń bilim berý salasyndaǵy kóp jylǵy jemisti eńbegi úshin oǵan alǵys bildirdi.