Býrabaıda ótip jatqan Ulttyq quryltaıda Memleket basshysy Qasym-Jomart Toqaev salyq reformasy men áleýmettik salany qarjylandyrý máselelerine qatysty pikir bildirdi, dep habarlaıdy aqshamnews.kz
«Úkimet salyq reformasyna qatysty jańa tásilderdi usyndy. Bul sharalar, jalpy alǵanda, durys. Onda negizgi ekonomıkalyq jáne áleýmettik faktorlar eskerilgen», – dedi Prezıdent.
Qasym-Jomart Toqaev sondaı-aq qosymsha qun salyǵynyń mólsherlemesin kóterý qajettigine qoǵamda túsinistik baryn atap ótti.
«Kásibı mamandar da, jalpy jurtshylyq ta qosymsha qun salyǵynyń mólsherlemesin kóterý qajettigine túsinistikpen qaraıdy. Degenmen usynylǵan sharalarǵa, sonyń ishinde, qosymsha qun salyǵyna qatysty syn-pikirler de estilip qalady. Biraq mundaı paıym shynaıy ahýalǵa negizdelmegen», – dep túsindirdi Prezıdent.
Memleket basshysy Qazaqstannyń áleýmettik memleket ekenin jáne búdjet qarjysynyń jartysynan kóbi áleýmettik salanyń enshisinde ekenin atap ótti.
«Bizdiń elimiz – áleýmettik memleket. Sondyqtan bilim berý, densaýlyq saqtaý salalaryna ınvestısıa salýdy jalǵastyramyz. Bul – bizdiń konstıtýsıalyq mindetimiz», – dedi ol.
Alaıda, Prezıdent shyn muqtaj azamattarǵa ǵana kómek kórsetilýi kerek ekenin atap ótti.
«Qyzmetin asyra paıdalanýǵa, alaıaqtyqqa jol berilmeıdi. Sondyqtan basymdyq berilmegen jobalarǵa bólinetin qarjy azaıady. Bul qajet shara ekeni aıdan anyq», – dep qosty Qasym-Jomart Toqaev.
Prezıdent Úkimetke osy jyldyń sońyna deıin áleýmettik salany qarjylandyrýdy ońtaılandyrý joldaryn naqty anyqtaýdy tapsyrdy.