Memleket basshysy Ózbekstan Prezıdentin el Táýelsizdigimen quttyqtady
Prezıdent Qasym-Jomart Toqaev jeke óziniń jáne barsha qazaqstandyqtardyń atynan Ózbekstan Prezıdenti Shavkat Mırzıóevti jáne ózbek halqyn el Táýelsizdiginiń 30 jyldyǵymen quttyqtady, dep habarlaıdy almaty-akshamy.kz Aqorda saıtyna silteme jasap.
«Baýyrlas Ózbekstan bul aıtýly kúnge ulttyq birtutastyǵymen, ekonomıkalyq damýynyń joǵary qarqynymen jáne álemdik qoǵamdastyqta laıyqty bedelimen qýatty ári órkendegen memleket retinde jetip otyr. Ózbek halqy Sizdiń jasampazdyq saıasatyńyz ben tabysty júzege asyp jatqan aýqymdy reformalaryńyzdy qoldaı otyryp, turaqty damý jolyn jalǵastyra beretinine senimdimin», – dep jazylǵan Memleket basshysynyń jedelhatynda.
Qasym-Jomart Toqaev eki el arasyndaǵy tarıhy tereń strategıalyq yntymaqtastyqqa joǵary baǵa berdi. Jedelhatta memleket basshysy eki el arasynda atqarylyp jatqan jumys ekijaqty deńgeıde de, aımaqtyq jáne halyqaralyq yntymaqtastyq aıasynda da Qazaqstan men Ózbekstannyń ózara is-qımylyndaǵy zor áleýetti tolyq iske asyrý úshin qyzmet etetinine senim bildiretinin aıtqan.
Qasym-Jomart Toqaev Shavkat Mırzıóevke jaýapty memlekettik qyzmette tabys, baýyrlas Ózbekstan halqyna órkendeý men órleý tiledi.