Búgingideı ýaqyttyń qıyndyǵy oryn alyp otyrǵanyna qaramastan, Memleket basshysy Qasym-Jomart Toqaev Parlament palatalarynyń birlesken otyrysynda «Halyq birligi jáne júıeli reformalar – el órkendeýiniń berik negizi» atty Qazaqstan halqyna Joldaýyn jasady.
El ıesiniń ár sózine erekshe mán beretin halqymyz jyl saıyn ómirimizde, óńirimizde qandaı jańalyq, nendeı ózgeris bolady dep eleńdep otyratyny ras. Jasyratyny joq, mádenıet salasynyń qyzmetkerleri men ardagerleri aldymen óz jaǵdaılaryna kóńil bólingenin qalaıdy.
««2022 jyldan bastap mýzeı qyzmetkerleri men kitaphanashylardyń jalaqysy ósedi», - dep málimdedi Memleket basshysy.
Durys. Mádenıetti, rýhanı sýsyn bolatyn jaqsy dúnıelerdi umyt qaldyrmaǵan jón. Kınonyń, teatrdyń ardagerlerin dáriptep otyrý lázim. Ultymyz jańa sapaǵa kóshýi úshin kúndelikti ómirlik ustanymymyz da ózgeris bolýy kerek.Qazaq qoǵamynda ulttyq jańa qaǵıdattar, jańa baǵdarlar saltanat qurýǵa tıis. Óner adamynyń ómiri men kileń tartys pen qınalystan turatyn taǵdyry, tájirıbesi keıingige úlgi bolǵany izgi. Ol úshin óner abyzdarynyń kúndelikterin, olar jaıynda jazylǵan derekti kitaptardy kóptep shyǵarǵan durys.
Joldaýda osy máselelerdiń bári keńinen sóz boldy. Endi olardy tıisti jaýapty mınıstrlikter men vedomstvolar júzege asyrsyn. Keler jyldan bastap búdjet salasy qyzmetkerleri jalaqysynyń 20 paıyzǵa ósetini týraly jaǵymdy jańalyq ta joq emes. Sol mol qarjy tıisti, kózdelgen maqsatqa paıdalanylsa, quba-qup bolar edi.