Jaǵdaıdy turaqtandyrý úshin qandaı qadamdar jasalady? Prezıdent sheshimin aıtty, dep habarlaıdy almaty-akshamy.kz
Óńir ákimderi aımaqtaǵy áleýmettik-ekonomıkalyq jaǵdaıǵa qaraı sheshim qabyldaıdy. Komýnaldyq tarıfterdi 180 kúnge, ıaǵnı alty aıǵa deıin kóterýge moratorıı engiziledi. Halyqtyń áleýmettik jaǵdaıy nashar toptary úshin naryqtaǵy baspanany jalǵa alý quny sýbsıdıalanady. Densaýlyq saqtaý jáne balalar máselesin sheshý úshin «Qazaqstan halqyna» dep atalatyn qoǵamdyq qor qurylady. Ol memlekettik jáne jeke kózder arqyly qarjylandyrylady. Qasym-Jomart Toqaev jıyn ótkizip, áleýmettik-ekonomıkalyq ahýaldy turaqtandyrý úshin osyndaı tapsyrma berdi.
Memleket basshysy ákim, shendi-shekpendini Aqordaǵa jınady. Jedel túrde eldegi ahýaldy turaqtandyrý kerek. Tańda Úkimet otstavkaǵa ketti. Asqar Mamınniń mindetin atqarý birinshi vıse-premer bolǵan Álıhan Smaıylovqa júkteldi. Ata zańǵa sáıkes Premer-mınıstr qyzmetten bosatylǵan soń búkil Úkimettiń ókilettigi toqtaıdy. Úkimet músheleri jańa quram jasaqtalǵansha, óz mindetterin atqara beredi. Endigi jerde qandaı sharalar qabyldanady? Nege basymdyq berý kerek?
– Inflásıaǵa jol bermeý – atqarýshy bıliktiń basty mindetteriniń biri. Biraq ol oryndalmady. Bul el Úkimetiniń kelesi quramynyń jáne mınıstrler kabınetiniń jańa basshysynyń eń basty mindeti bolady - dedi Qazaqstan Respýblıkasynyń Prezıdenti Qasym-Jomart Toqaev.
Qasym-Jomart Toqaev Úkimettik komısıaǵa, quqyq qorǵaý organdaryna jáne Mańǵystaý oblysynyń ákimine jaǵdaıdy turaqtandyrý jumystary úshin alǵys bildirdi. Al suıytylǵan gaz baǵasynyń ósýine Úkimet, sonyń ishinde, Energetıka mınıstrligi men «Qazmunaıgaz» jáne «Qazaqgaz» kásiporyndary kináli dedi. Almaty qalasy men Mańǵystaý oblysynda jarıalanǵan tótenshe jaǵdaıdan keıin ahýal birtindep túzelmek. Jalpy túptiń túbinde osyndaı problema týyndaıtynyn Memleket basshysy bildi. Bildi de, byltyr maýsymda Mańǵystaý oblysyndaǵy «Qazaq gaz óńdeý zaýyty» bazasynda suıytylǵan gaz óndiretin jańa zaýyt salýǵa pármen berdi. Alaıda tapsyrma der kezinde oryndalmady.
– Qazirgi ýaqytta jobanyń tek tehnıkalyq-ekonomıkalyq negizdemesi ǵana daıyndalǵan. Ony qarjylandyrý máselesi sheshilmegen. Ekinshiden, suıytylǵan gazdy taratý jáne saýdaǵa shyǵarýdyń qazirgi tártibi pysyqtalmaǵan. Elektrondy saýda barysynda baǵanyń ósýin shekteý tetikteri qarastyrylmaǵan. Nátıjesinde Energetıka mınıstrligi elektrondyq saýda boıynsha jedel áreket etip, ony aýyzdyqtaı almaǵan - dedi Qazaqstan Respýblıkasynyń Prezıdenti Qasym-Jomart Toqaev.
Elde gaz salasyn reformalaýǵa qatysty júıeli ádis joq. Sondyqtan salada ózgerister bolady degen Prezıdent aldaǵy ýaqytta ishki naryqty taýarlyq gazben tolyqqandy qamtamasyz etýdi buıyrdy.
– Eshkim ózin únemi shyǵynǵa ushyrata bermeıtinin túsiný mańyzdy. Elimiz gaz jáne gaz óńdeý salalarynda ınvestısıasyz, tipti gazsyz qalýy da múmkin. Sondyqtan júıeli, biraq oılastyrylǵan jáne kezeń-kezeńimen júzege asyrylatyn reformalardan basqa jol joq. Aldaǵy ýaqytta gaz salasyn sapaly túrde qaıta qarap, ishki naryqty taýarlyq gazben tolyqqandy qamtamasyz etý kerek - dedi Qazaqstan Respýblıkasynyń Prezıdenti Qasym-Jomart Toqaev.
Endi ne bolady? Jaǵdaıdy turaqtandyrý úshin qandaı qadamdar jasalady? Prezıdent sheshimin aıtty.
– Birinshiden, men Mańǵystaý boıynsha Úkimettik komısıanyń usynǵan sharalar keshenin maquldaımyn.
Ekinshiden, monopolıaǵa qarsy organǵa Kásipkerlik kodekstiń 119-babyna sáıkes suıytylǵan gazdyń baǵalaryn 180 kúnge ýaqytsha baǵalyq retteýdi engizýdi tapsyramyn. Oblystarda halyq úshin shekti baǵalar ótken jyldyń sońyndaǵy baǵa deńgeıinen aspaýǵa tıis.
Úshinshiden, Úkimetke suıytylǵan gazdy elektrondyq saýda alańdary men bırjalar arqyly ótkizýge tolyq kóshýdi bir jylǵa shegerýdi tapsyramyn. Osy kezeńde normatıvtik-quqyqtyq bazany muqıat ázirlep, saýda alańdary jumysynyń ashyq bolýyn qamtamasyz etý, baǵanyń kúrt ósýin shekteý tetikterin engizý qajet.
Tórtinshiden, Bas prokýratýraǵa básekelestikti qorǵaý agenttigimen birlesip, baǵalyq sóz baılasý men ózge de básekelestikke qarsy is-áreketterge qatysty tergeý júrgizýdi tapsyramyn. Tergeýdi jedel júrgizińiz. Jıyrma kún ishinde esep berińiz - dedi Qazaqstan Respýblıkasynyń Prezıdenti Qasym-Jomart Toqaev.
Gazben qosa benzın, dızel, áleýmettik mańyzy bar azyq-túlik taýarlarynyń da baǵasy retteledi. Óńir ákimderi aımaqtaǵy áleýmettik-ekonomıkalyq jaǵdaıǵa qaraı sheshim qabyldaıdy. Komýnaldyq tarıfterdi 180 kúnge, ıaǵnı alty aıǵa deıin kóterýge moratorıı engiziledi. Halyqtyń áleýmettik jaǵdaıy nashar toptary úshin naryqtaǵy baspanany jalǵa alý quny sýbsıdıalanady. Densaýlyq saqtaý jáne balalar máselesin sheshý úshin «Qazaqstan halqyna» dep atalatyn qoǵamdyq qor qurylady. «Jeke tulǵalardyń bankrottyǵy týraly» Zań ázirlenedi.
Eldiń saıası, áleýmettik jáne ekonomıkalyq qurylymy ózgermeıdi. Ýnıtarlyq, zań ústemdik qurǵan memleket bolyp qala beremiz. Naryqtyq ekonomıka qaǵıdatynan aınymaımyz. Keńes sońynda Prezıdent osylaı dedi.