Jańa Úkimettiń aldynda elimizdiń ekonomıkalyq áleýetin tolyq qalpyna keltirý mindeti tur - Prezıdent
Ótken jyly el ekonomıkasy 4 paıyzǵa ósti. Bul týraly Úkimettiń keńeıtilgen otyrysynda QR Prezıdenti Qasym-Jomart Toqaev aıtty, dep habarlaıdy Almaty-akshamy.kz QazAqparatqa silteme jasap.
«Ótken jyly el ekonomıkasy 4 paıyzǵa ósti. Óńdeý ónerkásibi 5,5, qurylys ındýstrıasy 7,6 paıyzǵa artty. Qyzmet kórsetý salasynda oń úrdis bar. Saýda-sattyq 9,2, kólik salasy 3,6 paıyzǵa ulǵaıdy. Degenmen, ınflásıa deńgeıi mejeden asyp ketti. Bul kórsetkish 8,4 paıyz boldy. Ókinishke qaraı, qańtar oqıǵasy qalypty ómirimizdi túbegeıli ózgertti. Zańsyz áreketterdiń saldarynan kóptegen azamatymyz zardap shekti. Shaǵyn jáne orta bıznes ókilderi shyǵynǵa ushyrady», - dep atap ótti Memleket basshysy.
QR Prezıdenti qazirgi málimetter boıynsha bızneske 100 mlrd teńgeden astam kólemde zalal kelgenin atap ótti.
«Jańa Úkimettiń aldynda elimizdiń ekonomıkalyq áleýetin tolyq qalpyna keltirý mindeti tur. Bul óte mańyzdy mindet. Sondyqtan ony basymdyqtardyń biri retinde sanaýymyz qajet. Josparlanǵan reformalardy júzege asyrý jáne ınflásıany tómendetý basty mindetterdiń biri. Eń bastysy azamattarymyzdyń tabysyn arttyrýymyz qajet»,- dedi Qasym-Jomart Toqaev.
Qazirgi ýaqytta QR Premer-Mınıstri Álıhan Smaıylov elimizdi damytý úshin atqarylǵan sharalar men Úkimettiń aldaǵy jospary týraly baıandap jatyr. Odan keıin Ulttyq bank tóraǵasy Ǵalymjan Pirmatov aqsha-nesıe saıasaty týraly aıtady. Almasadam Sátqalıev «Samuryq-Qazyna» qorynyń qyzmeti jáne ony reformalaý týraly baıandaıdy. Munan bólek, Almaty, Jambyl jáne basqa da oblystardyń ákimderi jáne Almaty qalasynyń ákimi óńirlerdiń áleýmettik-ekonomıkalyq damý barysy jaǵynan esep beredi.