Almatyda ornalasqan LA-155/6 mekemesi – elimizdegi kámeletke tolmaǵan qylmyskerler jazasyn óteıtin jalǵyz oqshaýlaý orny. Qazirgi ýaqytta túzeý mekemesinde bas bostandyǵynan aıyrylǵan 59 jasóspirim otyr.
Balalar kolonıasynda olar tórt qabyrǵada qamalyp otyrǵan joq, árıne. Mektepte oqıdy. Kásiptik bilim alady. Túrli ádebı-mádenı is-sharalarǵa qatysady. Al mekeme ishinde jumys istep turǵan kitapqa baı kitaphananyń orny tipti erekshe. Jazasyn óteýshiler bos ýaqytynda osy jerden ózderine kerekti aqparat alady, kórkem shyǵarmalar oqıdy. Al bul aıaǵyn jaza basqan jetkinshekter úshin asa qajet ekeni aıtpasa da túsinikti.
Qazirgi tańda mekeme kitaphanasynyń qorynda barlyǵy 3020 kitap bar. Onyń 1200-i qazaq tilinde, al 1820-y oryssha. Munda ádebı kitaptar, fantasıkalyq, detektıv shyǵarmalar, sheteldik klasıka, psıhologıalyq janrda jazylǵan týyndylar kóp. Sondaı-aq, kitaphana sóresinde Qazaqstan Musylmandary dinı basqarmasy ruqsat etken 55 dinı kitap bar. Osy oraıda aıta ketsek, QR Bilim jáne ǵylym mınıstrligi Balalardyń quqyqtaryn qorǵaý komıtetiniń ókilderi kitaphanaǵa ádistemelik qoldaý kórsetý maqsatynda byltyr 43 kitap syılaǵan.
Jýyrda kolonıa kitaphanasy taǵy da jańa kitaptarmen tolyqty. Kitap bolǵanda qandaı! QR-nyń Adam quqyqtary jónindegi ýákili Elvıra Ázimova jasóspirimderge 5 elektrondy planshet-kitap tartý etti. Sondaı-aq, shahardaǵy Jambyl atyndaǵy jasóspirimder kitaphanasynyń mamandary sórege 100 kitap ákep qosty. Al «Karavan» gazetiniń ujymy 350 kitap syılady.
LA-155/6 mekemesinde bas bostandyǵynan aıyrylǵan balalarmen tárbıelik jumystar júrgizetin maman E.Jeńisqannyń aıtýynsha, jasóspirimder bos ýaqytynda kitaphanaǵa, kitap oqýǵa asyǵyp turady eken. Bul jaqsy ǵoı. Demek, aıaǵyn jaza basqan balalardyń túzelýine, erteńge degen senimin joǵaltpaýyna kepildik bar.