Qazir jumys tańdamaıtyn zaman. Bastysy, ýaqytty tıimdi paıdalaný qajet. Sonda oıǵa alǵan is alǵa basady.
Álem pandemıa jaǵdaıynda ómir súrgeli birshama ýaqyt ótti. Naqtyraq aıtqanda, 2 jyldan asty. Bul jaǵdaı jahan jurtyn basqasha ómir súrýge úıretti. Servıstik qyzmetter jaǵy artty. Iaǵnı jetkizýshi bolyp jumys isteıtin jastar kóbeıdi. Osyǵan oraı saýalnama júrgizgen edik.
Shyńǵys QAIRAT,
Glovo jetkizýshisi:
– Karantın bizderdiń ómirimizdi múlde basqa arnaǵa burdy. Buǵan deıin kúzetshi bolyp istep júrdim. Arasynda ár jerde jumys jasadym. Bir kúni tanysymdy jolyqtyryp qaldym. Áńgimelese kele, qal-jaǵdaıymdy aıttym. Ol bolsa, meni Glovo-ǵa jumys isteýge shaqyrdy. Osylaısha jetkizý qyzmetinde júrgenime bir jyldan asty. Tabysy jaqsy. Qazir kólik satyp aldym. Alǵashynda jaıaý qatynadym. Odan kóp sharshaısyń. Búginderi tirligim ońdaldy. Meniń túsingenim - tynbaı tirlik jasaı berý kerek eken. Sonda is ońady. Qolym qalt etse, jeke kásipti ashýdyń jaıyn zerdeleımin. Jaqynda dosym ekeýmiz «elektrondy servısti» damytýdy josparlap júrmiz. Óz elimizde AliExpress, Ozon syndy jetkizý qyzmetterin damytqymyz keledi. Alys-jaqyn shet elge tanymal bolsa, qarjynyń bir sheti Qazaqstan arqyly aınalymǵa túsetin bolady. Bizder ıgi ıdeıalar baǵytynda qozǵalýdy jón sanaımyz.
Abzal NURADDINOV,
«Iandeks» jetkizýshisi:
– Osy jumyspen aınalysyp júrgenime – 2 jyl. Tańǵy saǵat 10.00-den bastap slot ashylady. Sodan bastap tún ortasyna deıin júremin. Oıda bir-aq nárse – ýaqyt alyp, mol tapsyrys qabyldaý. Tapsyrysty qanshalyqty kóp alsańyz, sonshalyqty tabysty da mol tabasyz. Eń bastysy, erinbeý kerek. Dál qazirgi ýaqytta alǵan tapsyrystarymdy mopedpen jetkizemin. Neshe túrli oqıǵalar men tutynýshylardy kóresiz. Negizi, ońaı is joq. Men sondyqtan sabyr saqtap, kúndelikti isime tyńǵylyqty bolýǵa tyrysamyn. Alda óz oılaǵandaryma jetetinime senemin. Sol jolda barymdy salamyn. Ázirge, munyń barlyǵy men úshin tájirbıe. Qazir jumys tańdaıtyn zaman emes. Osyny uqtym. Biraq qur júretin kezeń kelmeske ketti. Oıda birqatar kásipterdiń jospary tur. Buıyrsa, birshama qarajat jısam, oılaǵanymdy iske asyrýdy kózdeımin.
Eńbek adamzatty órge súıreıdi. Sonyń ishinde jas kúninen bastap eńbekke erte aralasqandar ozady. Jahanǵa ataǵy jaıylǵan aýqatty jandardyń ómir jolyna zer salsańyz, bári táýekelden bastaǵan. Eń negizgisi, qaı salada júrseńiz de, adal nátıjeli jumys jasaýǵa nıettegen abzal.
Túıip aıtqanda, eńbek ete bilgen adam nan qadirin biledi. Talaptanǵan azamattyń bıik shyńdardy baǵyndyrary sózsiz.