Memleket basshysy birneshe kúnnen beri elordada túrli mádenıet pen órkenıet ókilderi bas qosyp jatqanyn aıtty, - dep habarlaıdy Aqshamnews.kz.
– Meımandarymyzdyń dini men dili bólek bolsa da, tilegi men nıeti bir ekeni sózsiz. Sıeziń qorytyndy Deklarasıasy – sonyń aıqyn dáleli. Qujatta ortaq ıdeıalar men usynystar kórinis tapty. Jalpy, forýmnyń túpki máni de – osy. Biz qurmet pen syılastyqqa negizdelgen syndarly dıalogtyń kýási boldyq. Eń bastysy, dinbasylar ortaq múdde jolynda kúsh biriktirýge daıyn ekenin kórsetti, – dedi Prezıdent.
Qasym-Jomart Toqaevtyń aıtýynsha, shyn máninde, salmaqty jáne syndarly dıalog – naǵyz danalyqtyń kórinisi.
– Sizder búkil álemge kóregendik pen parasattylyqtyń úlgisin kórsetip otyrsyzdar. Geosaıası turaqsyzdyq beleń alǵan kúrdeli kezde munyń mán-mańyzy aıryqsha. Forým búginde dinder men mádenıetter arasyndaǵy yqpaldastyqty damytýdyń, barsha adamzattyń jarqyn bolashaǵy úshin yntymaqtastyqty nyǵaıtýdyń qanshalyqty mańyzdy ekenin kórsetti. Plenarlyq jáne seksıalyq otyrystarda, dinı oryndar men nyshandardy qorǵaý boıynsha arnaıy sesıalarda, sarapshylar dóńgelek ústelinde jáne jas dinı kóshbasshylar forýmynda kóptegen qundy ıdeıa men usynys aıtyldy. Sizder destrýktıvti aǵymdar men zorlyq-zombylyqty qatań aıyptap, qazirgi daǵdarystardy retteý múmkindikterin qarastyrdyńyzdar, áleýmettik teńsizdikti eńserý men ınklúzıvti qoǵam qurý joldaryn talqyladyńyzdar. Ekologıa, ornyqty damý, jańa tehnologıalar men jasandy ıntellektiniń adam ómirine áseri máselelerine erekshe mán berildi. Sıeziń ashylýynda sóılegen sózimde dinı dıplomatıanyń halyqaralyq arenadaǵy dıalog pen senimdi nyǵaıtýda mańyzdy ról atqaratynyn aıtqan edim. Sizderdiń de bul ustanymmen kelisetinderińiz qýantady, – dedi Memleket basshysy.