Ákimder joǵary nátıjege qol jetkizý úshin eski úıler men saıajaılardy da esepke qosyp jiberedi degen aqparat bar. Bul týraly Úkimettiń keńeıtilgen otyrysynda QR Prezıdenti Qasym-Jomart Toqaev aıtty, dep habarlaıdy Almaty-akshamy.kz
«Byltyr elimiz boıynsha 17 mln sharshy metr turǵyn úı salyndy. Bul - buryn eshqashan bolmaǵan kórsetkish. Alaıda, onyń qanshalyqty durys málimet ekenin tekserý kerek. Ákimder joǵary nátıjege qol jetkizý úshin eski úıler men saıajaılardy da esepke qosyp jiberedi degen aqparat bar. Al bıyl byltyrǵydan 1 mln sharshy metr artyq úı salynady dep josparlanyp otyr. Biraq, qurylystyń mundaı qarqynyna komýnaldyq ınfraqurylym ilese almaı jatyr. Elordamyzdaǵy ahýal - osynyń aıqyn dáleli», - dedi Prezıdent.
Memleket basshysynyń dereginshe, qalada aldaǵy 3 jylda saǵatyna 900 Gkall jylý tapshylyǵy bolýy múmkin.
«Dál osyndaı másele keıbir oblys ortalyqtarynda da bar. Qurylys josparyn eskere otyryp, oǵan qansha komýnaldyq ınfraqurylym qýaty qajet bolatynyn boljaı bilýi kerek. Úkimet bul jumysty ákimdermen birlesip atqarýǵa tıis. Osy taldaýdyń negizinde naqty sharalar qabyldaý qajet. Munan bylaı tıisti ınjenerlik jáne áleýmettik ınfraqurylymy bar jerge ǵana turǵyn úı salynýy kerek», - dedi Qasym-Jomart Toqaev.