Almatyda jol qozǵalysynyń qaýipsizdigin qamtamasyz etýdi kózdeıtin keshendi is-sharalar qolǵa alyndy: 1 jeltoqsannan 1 naýryzǵa deıin elektrsamokatty paıdalanýǵa tolyq tyıym salynyp, operatorlarǵa kólikti kósheden alyp tastaý mindetteldi.
Sonymen qatar polısıa júrgizýshilerden bastap jaıaý júrginshiler men kóliktiń balama túrimen júretinderge deıin barlyǵyna baqylaýdy kúsheıtpek, - dep habarlaıdy Aqshamnews.kz.
Bul týraly Óńirlik komýnıkasıalar qyzmetindegi baspasóz konferensıasynda Almaty qalasy PD Ákimshilik polısıa basqarmasy basshysynyń orynbasary Tımýr Serikuly habarlady.
Onyń aıtýynsha, qalada elektrsamokat, moped pen elektrvelosıpedke otyrǵandar kóbeıgendikten júıeli túrde baqylap, ýaqytyly oqys oqıǵanyń aldyn alyp otyrýǵa týra keledi. Bıyl da jol erejesin buzǵandardyń kóbi júrgizýshilerdiń ózi bolypty: beınekamera arqyly shamamen 4 mln quqyqbuzýshylyq tirkelse, taǵy 567 965 jaǵdaıdy patrúldik qyzmet anyqtaǵan. Onyń 518 355-in júrgizýshiler, 49 610-yn jaıaý júrginshiler, 17 154-in elektrsamokat pen 623-in elektrvelosıped mingender jasaǵan.
Polısıanyń aıtýynsha, qysqy maýsymda elektrosamokattardyń jumysyn toqtatý jaraqat alý qaýpin aıtarlyqtaı tómendetip, qozǵalystyń qaýipsizdigin qamtamasyz etpek. Kóliktiń balama túrin paıdalanatyndarǵa arnalǵan qosymsha profılaktıkalyq is-sharalar jol jaǵdaıyna jasalǵan taldaý negizinde jańa maýsymnyń basynda anyqtalatyn bolady.
Ál-Farabı, Seıfýllın men Tóle bı sıaqty adam kóp júretin kóshede jyldamdyqty arttyrǵany úshin jaýapkershilikti kúsheıtý jaǵy ázirge qarastyryla qoıǵan joq. Biraq dál osy uzyn ári júktemesi joǵary kóshede jol apaty jıi tirkeledi. Ondaı jerlerge polısıa qosymsha kamera qoıyp, saqshylardy kúsheıtip, JKO sebepterin ýaqytyly taldap otyrady.
Jasóspirimderge de kóp kóńil bólingen, sebebi olar samokat pen velosıpedti jıi paıdalanady. Mektepte semınar, trenıńter, jol qozǵalysy erejesi boıynsha sabaq ótkiziledi, IýID synyptary jumys isteıdi, onda balalarǵa jolda qalaı júrip-turý kerektigin úıretedi. Bul jumys jyl boıy jalǵasyp, balalardyń jaraqat alýyn azaıtýǵa kádimgideı kómegi tıip jatyr.
Almatylyqtar da tártip saqtaýǵa belsendi atsalysa bastady: kún saıyn 102 qyzmetine shamamen 300 ótinish, mobıldi qosymsha arqyly taǵy 100 shaqty habarlama túsedi. Kóbine turǵyndar kólikti durys qańtarmaı, mas kúıde rólge otyryp, qarsy baǵytqa shyǵyp, qyzylǵa ótip ketkenderdi habarlap aıtady. Ár habarlamany jaqyn mańdaǵy saqshy dereý tekseredi.
Polısıa jaıaý júrginshiler arasyndaǵy quqyqbuzýshylyqtyń aldyn alý úshin mektepter, bazarlar men saýda ortalyqtarynyń mańynda kezekshilikti kúsheıtip, «Jaıaý júrginshi», «Nazar aýdaryńyzdar, balalar!» aksıasyn ótkizip júr. Qazirge deıin 49 610 jaıaý júrginshi jaýapqa tartylǵan.
Sýyq túskendikten júrgizýshiler 1 jeltoqsanǵa deıin qysqy dóńgelekti aýystyrýy kerek. Komýnaldyq qyzmetter kóshe men trotýarlarǵa kóktaıǵaqtan qorǵaıtyn qospa seýip, tazalap jatyr. Bul úshin qalada arnaýly tehnıkanyń jetkilikti qory bar. Osynyń barlyǵy qysqy kezeńde jol-kólik oqıǵasyn azaıtyp, qaýipsizdikti arttyrýǵa baǵyttalǵan.