Astanadaǵy International Steppe School mektebinde jańa, ınteraktıvti formatta ata-analar jınalysy ótti.
Jınalystyń basty taqyryby - balalar men jastardy esirtkiden qorǵaý boldy, - dep habarlaıdy Aqshamnews.kz.
Jınalys QR İİM Esirtki qylmysyna qarsy is-qımyl komıteti men Prezıdent janyndaǵy jastar saıasaty jónindegi keńestiń birlesken jumysy aıasynda uıymdastyryldy. Bul jıynda resmı baıandamanyń ornyna ashyq dıalog boldy, qurǵaq statısıka ornyna naqty mysaldar keltirildi.
Sonymen qatar ata-analar men jasóspirimderge tónip turǵan naqty qaýipter týraly ashyq áńgime órbidi.
Jınalys barysynda mamandar tómendegilerdi egjeı-tegjeıli túsindirdi:
Kámeletke tolmaǵandardy zańsyz esirtki aınalymyna tartýdyń qazirgi ádisteri;
Esirtki qoldanýdyń syrtqy jáne minez-qulyqqa tán belgileri;
Ata-analarǵa der kezinde balalarǵa kómek kórsetýdiń mańyzy.
Jınalysta ata-analardy "test ár úıge" profılaktıkalyq formaty erekshe qyzyqtyrdy. Olarǵa bul tekserýdi óz betimen, jyldam jáne qoljetimdi túrde júrgizýge bolatyny tájirıbe júzinde kórsetildi.
Bul qural profılaktıkanyń negizi — otbasynan bastalatynyn aıqyn kórsetti. Negizgi bólimnen keıin zal birden taramady. Ata-analar belsendi suraq qoıyp, jeke baqylaýlary men qıyn jaǵdaılardy talqylady, sonymen qatar profılaktıkalyq jumysty kúsheıtýge óz usynystaryn aıtty.
Tıimdi profılaktıka — qorqytý nemese formaldy esep emes. Bul — senim, aqparattandyrý jáne ortaq jaýapkershilik. İİM Esirtki qylmysyna qarsy is-qımyl komıteti osyndaı formattardy ári qaraı da damytýdy josparlap otyr. Jınalystar tek elordada emes, elimizdiń barlyq óńirinde ótkiziledi.