Almaty mýzeıinde Temirbek Júrgenov atyndaǵy Qazaq ulttyq óner akademıasynyń «Keskindeme, músin jáne dızaın» fakúlteti stýdentteri men magıstranttarynyń birlesken «Murager» atty shyǵarmashylyq kórmesi ashyldy. Ekspozısıada 70-ten astam keskindeme, grafıka jáne sándik-qoldanbaly óner týyndylary usynyldy.
«Murager» Ábilhan Qasteevtiń 120 jyldyǵyna arnaldy. Óneri ómirsheń birtýar tulǵa Á.Qasteev – artynan óshpes mura qaldyrǵan, qazaq beıneleý óneriniń negizin qalap ketken sheber sýretshi.
Al búgingi kórmege qatysyp otyrǵan jastar sol kórkem mádenı mekteptiń qalyptasyp damýyna úles qosqan otandyq beıneleý ónerindegi jarqyn tulǵalardyń sheberhanalarynan dáris alǵan daryndy shákirtter. Olardy jańa zaman óneriniń bet-beınesin qalyptastyrýshy jas býyn ókilderi, Ulttyq mekteptiń jas muragerleri dep áspettesek te artyq emes.
Atalmysh kórmede jas qylqalam sheberleriniń kórmede keskindeme, grafıka, músin, kórkem vıtraj jáne sándik-qoldanbaly óner túrlerinde oryndalǵan úzdik dep tanylǵan shyǵarmalary usynyldy. Alýan taqyrypty myń san boıaýmen «sóıletken» týyndylar kóz qýantady. Jastardyń shyǵarmalary Almaty mýzeıiniń tórinde 14 sáýirge deıin turady.