Memleket basshysy Qarjylyq monıtorıń agenttiginiń tóraǵasyna tapsyrmalar berdi
Memleket basshysy Qarjylyq monıtorıń agenttiginiń tóraǵasy Janat Elımanovty qabyldady, dep habarlaıdy Almaty-akshamy.kz Aqordanyń baspasóz qyzmetin,e silteme jasap.
Prezıdentke Agenttiktiń bıylǵy 10 aıda atqarǵan jumysy týraly esep berildi.
Memleket basshysyna qylmystyq isterdi jappaı qozǵaý tájirıbesiniń joıylǵany jáne adal bıznesti qylmystyq qýdalaýdyń azaıǵany jóninde baıandaldy. Sonyń nátıjesinde sotqa deıingi tergep-tekserý amaldarynyń sany jyl saıyn azaıyp kele jatqany baıqalady. Atap aıtqanda, ótken jylmen salystyrǵanda tirkelgen ister sany 30 paıyzǵa tómendegen.
Janat Elımanovtyń aıtýynsha, qabyldanǵan sharalar keltirilgen shyǵyndardy óteýge, 300 mıllıard teńgeden astam aktıvti qaıtarýǵa múmkindik berdi. Jıyrma bes uıymdasqan qylmystyq toptyń joly kesildi.
Aqshany qolma-qol shyǵarýmen aınalysatyn 119 toptyń qyzmetine tosqaýyl qoıyldy.
Budan bólek, Memleket basshysyna 25 qarjy pıramıdasy joıylyp, jábirlenýshilerdiń 8,3 mıllıard teńge shyǵyny ótelgeni týraly baıandaldy. Qarjylyq pıramıdalarmen kúres aıasynda zańsyz mazmundaǵy 8,8 myńǵa jýyq saıt pen akkaýnt buǵattalǵan. Prezıdenttiń tapsyrmasyn oryndaý maqsatynda qarjylyq barlaý qyzmeti esirtki satatyn 15 ınternet-dúkendi áshkerelegen. Olardyń jalpy saýda aınalymy 4,4 mıllıard teńgeni quraıdy jáne 27 myńnan asa azamatty qamtyǵan. Bul materıaldar İshki ister mınıstrligi men Ulttyq qaýipsizdik qyzmetine joldandy. Sıfrlyq aktıvterdi paıdalana otyryp, qylmystyq jolmen tapqan kiristi jylystatýǵa jáne terorızmdi qarjylandyrýǵa qarsy kúres aıasynda Agenttik Binance iri halyqaralyq krıptobırjasymen yntymaqtastyq týraly memorandýmǵa qol qoıǵan.
Sonymen qatar Prezıdentke Qazaqstannyń «qarjyny jylystatýǵa qarsy kúres» ulttyq júıesi FATF talaptaryna sáıkestigi boıynsha Ózara baǵalaýdan ótip jatqany jóninde málimet berildi.
Kezdesý sońynda Memleket basshysy qarjy pıramıdalary men alaıaqtyq áreketterdiń jolyn kesý boıynsha jumysty jalǵastyrýdy, sondaı-aq Agenttiktiń óz ishinde jemqorlyqqa qarsy is-qımyl sharalaryn kúsheıtýdi tapsyrdy.