QR Qarjy mınıstrligi jalaqy men shyǵystardy sıfrlyq baqylaýdy keńeıtý arqyly memlekettik aýdıttiń jańa deńgeıine shyǵýda.
Qazaqstan Respýblıkasy Qarjy mınıstrligi búdjet shyǵystaryn memlekettik aýdıtteýdi sıfrlandyrýdy belsendi túrde ilgeriletip keledi. Bul baǵytta «Onlaın búdjet monıtorıńi» modýlin qoldaný aıasyn keńeıtý jumystary júrgizilýde, dep habarlaıdy aqshamnews.kz.
Atalǵan júıe naqty ýaqyt rejıminde qarjy qarajatynyń maqsatty paıdalanylýyn baqylaýǵa múmkindik beredi, baqylaý prosesterin avtomattandyrady jáne zańbuzýshylyqtardy jedel anyqtaýǵa jol ashady. Nátıjesinde qarjylyq operasıalardyń ashyqtyǵy artyp, búdjet qarajatyn basqarýdyń tıimdiligi jaqsarady.
OBM júıesi áleýmettik sala uıymdaryndaǵy jalaqy tólemderin qashyqtan baqylaýǵa múmkindik beredi. Búginde monıtorıń tek bilim berý salasyn ǵana emes, densaýlyq saqtaý, mádenıet, týrızm jáne sport salalaryn da qamtıdy. Kún saıyn 6 myńǵa jýyq memlekettik mekemeniń 140 mıllıon teńgeden astam tranzaksıasy taldanady.
Aǵymdaǵy jyldyń basynan bastap jedel áreket etý arqyly 664 mıllıon teńgeden astam qarajatty talan-tarajǵa salýdyń aldyn alýǵa múmkindik týdy.
Sonymen qatar, buzýshylyqtardyń aldyn alý sharalary únemi tıimdi nátıje bere bermeıdi. Mundaı jaǵdaıda jaýapty tulǵalarǵa qatysty tıisti áreket etý sharalary qabyldanady. Máselen, Batys Qazaqstan oblysy aýdandarynyń birindegi kitaphana júıesinde júrgizilgen kóshpeli aýdıt barysynda býhgalterdiń jeke shotyna zańsyz aýdarylǵan 45 mıllıon teńgeden astam qarajat anyqtaldy. Almaty qalasynda QR Qarjy mınıstrligi İshki memlekettik aýdıt komıtetiniń aýmaqtyq departamenti tarapynan birneshe eskertý jasalǵan soń, qalalyq Bilim basqarmasy arnaıy gımnazıa dırektory men bir mekteptiń bir top býhgalterin jumystan bosatý týraly sheshim qabyldady.
OBM júıesiniń damýy barysynda monıtorıń nysandaryna táýekelder týraly avtomatty túrde habarlamalar generasıalap, joldaý fýnksıasy engizildi. Bul rette QR Sybaılas jemqorlyqqa qarsy is-qımyl agenttigi men onyń aýmaqtyq departamentteri de bir ýaqytta habardar etiledi. Bul qabyldanatyn sharalardyń aldyn alýǵa baǵyttalǵanyn taǵy bir márte dáleldeıdi.
«Onlaın búdjet monıtorıńi» modýli úlken kólemdegi derekterdi óńdeý jáne aýdıtorlar tarapynan habarlamalardy daıyndaý ýaqytyn aıtarlyqtaı qysqartty. Bul óz kezeginde baqylaý sharalarynyń jedeldigi men sapasyn arttyrýǵa yqpal etedi.
Sonymen qatar QR Qarjy mınıstrligi İshki memlekettik aýdıt komıteti men «Elektrondyq qarjy ortalyǵy» AQ birlesip, mobıldi qosymshalar arqyly zańsyz alynǵan búdjet qarajatyn qaıtarý boıynsha jańa fýnksıonal ázirleýde. Bul sıfrlyq sheshim aldyn alý sharalary sheńberinde erikti túrde qaıtarý rásimin edáýir jeńildetedi.
«Qarjy mınıstrligi óz prosesterin sıfrlandyrýǵa belsendi túrde umtylyp otyr. Zamanaýı tehnologıalardy engizý búdjet qarajatyn basqarýdaǵy ashyqtyqty, jedeldikti jáne tıimdilikti arttyrýǵa baǵyttalǵan. «Onlaın búdjet monıtorıńi» modýli sıaqty sıfrlyq quraldardy paıdalaný adamı faktordy azaıtyp, kúndelikti operasıalardy avtomattandyrýǵa jáne baqylaý sapasyn jaqsartýǵa múmkindik beredi. Bul memlekettik qarajattyń tıimdi jáne jaýapty jumsalýyna septigin tıgizedi», – dep qorytyndylady QR Qarjy mınıstri Mádı Takıev.