Almatyda "Jasyl el" eńbek maýsymynyń ashylý saltanaty ótti, - dep habarlaıdy aqshamnews.kz.
Almatyda "Jasyl el" jastar eńbek jasaqtarynyń jańa eńbek maýsymynyń saltanatty ashylýy ótti. İs-shara Almaty qalasy Jastar saıasaty basqarmasynyń qoldaýymen jáne Almaty qalasy "Jasyl el" qalalyq shtabynyń uıymdastyrýymen ótti.
Jobanyń negizgi maqsaty – Almaty qalasynyń jastaryn kógaldandyrý jáne abattandyrý jumystaryna tartý arqyly ýaqytsha eńbekpen qamtý, ekologıalyq sanany qalyptastyrý jáne patrıottyq rýhty damytý.
2025 jylǵy eńbek maýsymy aıasynda 2100 jas ýaqytsha jumyspen qamtylady dep josparlanýda. Qazirgi tańda olardyń ishinde 1266 jas jumysqa kirisip úlgerdi. Jastar qaladaǵy saıabaqtarda, skverlerde, ózen jaǵalaýlarynda jáne basqa da qoǵamdyq keńistikterde kógaldandyrý, tazalaý jáne abattandyrý jumystarymen aınalysyp jatyr.
Saltanatty ashylý rásimine memlekettik jáne qoǵam qaıratkerleri, jastar uıymdarynyń kóshbasshylary men belsendi jastar qatysty. Qurmetti qonaqtar qatarynda Almaty qalasy Jastar saıasaty basqarmasynyń basshysy Kajdenbek Azız, tanymal ekolog Skakova Aıjan, "Jasyl el" respýblıkalyq shtabynyń tóraǵasy Nurasyl Jasulanuly, qoǵamdyq keńes músheleri, úkimettik emes uıymdardyń ókilderi jáne jastar qozǵalystarynyń músheleri boldy.
Sonymen qatar, joba aıasynda Almaty qalasynyń 5 jetekshi joǵary oqý orny men ekologıalyq baǵyttaǵy seriktes uıymdar tartylyp, jastardy jumyspen qamtý boıynsha birlesken jumys belsendi túrde júrgizilýde. Bul seriktestik jastardyń ekologıalyq mádenıetin arttyrýǵa jáne olardyń tájirıbelik daǵdylaryn damytýǵa baǵyttalǵan.
İs-shara aıasynda merekelik konserttik baǵdarlama uıymdastyryldy. Qatysýshylarǵa erekshe kóńil kúı syılaǵan otandyq tanymal oryndaýshylar Dýman Marat pen ADIL óz ónerlerin kórsetti.
Jobanyń qatysýshysy, "Jasyl el" qatarynda úshinshi jyl jumys istep júrgen stýdent Oljabaı Mereı óz áserin bólisti:
"Jasyl el – bul jaı ǵana kógaldandyrý jumysy emes, bul – jaýapkershilik, dostyq pen damý mektebi. Ár maýsym men úshin týǵan qalama úles qosýǵa, jańa adamdarmen tanysyp, óz eńbegimniń mańyzdylyǵyn sezinýge úlken múmkindik", – dedi ol.
2004 jyldan bastap júzege asyrylyp kele jatqan "Jasyl el" baǵdarlamasy búginde Qazaqstandaǵy eń iri ekologıalyq-eńbek jastar jobalarynyń birine aınaldy. Almaty qalasynda bul baǵdarlama jyl saıyn myńdaǵan jasty biriktirip, olardyń eńbekke, patrıotızmge jáne ekologıalyq mádenıetke degen kózqarasyn qalyptastyrýda mańyzdy ról atqaryp keledi.