Munaıshylardyń eńbegi
Atyraýǵa jumys saparymen barǵan QR Premer-Mınıstri Álıhan Smaıylov Memleket basshysynyń tapsyrmasy boıynsha «Embimunaıgaz» AQ kompanıasynyń qurylǵanyna 100 jyl tolýyna oraılastyrylǵan saltanatty jıynǵa qatysty, dep habarlaıdy Almaty-akshamy.kz BAQ.KZ-ke silteme jasap.
Premer-Mınıstr óz sózinde QR Prezıdenti Qasym-Jomart Toqaev munaı-gaz sektoryn ekonomıkanyń basym baǵyttarynyń biri retinde damytýdyń mańyzdylyǵyn, sondaı-aq táýelsiz Qazaqstannyń damýynda salanyń jáne otandyq munaıshylardyń eńbegi zor ekenin udaıy erekshe atap ótetinin aıtty.
Álıhan Smaıylovtyń sózinshe, qazaq munaıynyń bastaýynda turǵan kásiporynnyń 100 jyldyq mereıtoıy – bul aıtýly mereke, óıtkeni Qarashúńgil jerinen tabylǵan «qara altyn» elimizdiń brendine aınaldy. Máselen, 1899 jyl Qazaqstan tarıhyna Jylyoı aýdanynda munaı kózi tabylǵan jyl retinde endi. 1922 jyly tres bolyp qurylǵan «Embimunaıgaz» – búgin óz baǵytyn naqty aıqyndaǵan, aıaǵyna nyq turǵan qýatty kásiporyn.
«Embilik geologtar elimizdiń Batys aımaǵyndaǵy iri munaı kenishterin ashýda zor eńbek sińirdi. Sonyń arqasynda munaı-gaz salasy el ekonomıkasy damýynyń lokomotıvine aınaldy», — dedi Álıhan Smaıylov.
Premer-Mınıstr bir ǵasyrlyq tarıhy bar «Embimunaıgaz» kásiporny qanshama dańqty munaıshylar áýletin tárbıelep, myńdaǵan ulttyq kadr daıyndap shyǵarǵanyn aıtty.
«Jer qoınaýyndaǵy qazba baılyqty izdeýden bastap, ony ıgerý men damytý mol qajyr-qaıratty, tereń bilim men tabandylyqty talap etedi. Osyndaı qıynshylyqtarǵa tótep berip, munaı óndirip, el ıgiligine úles qosqan munaıshylar eńbegi eshqashan umytylmaıdy! Memleket basshysy Qazaqstan halqyna Joldaýynda qarapaıym eńbek adamyna qurmet kórsetilý kerektigin atap ótti», — dedi Álıhan Smaıylov.
Sóz sońynda Premer-Mınıstr búgingi tańda «Embimunaıgaz» áleýmettik jaýapkershiligi retinde Atyraý oblysynyń damýyna da jan-jaqty qoldaý kórsetip kele jatqanyn atap ótti. Sonymen qatar Úkimet basshysy QR Prezıdentiniń atynan 25 ardager men sala qyzmetkerlerine túrli memlekettik nagradalar tabys etti.