Tyń bastamalar
Májilis depýtaty Edil Jańbyrshın keshegi Prezıdent Joldaýynda aıtylǵan máselelerge qatysty málimdeme jasady, dep habarlaıdy Almaty-akshamy.kz QazAqparat-qa silteme jasap.
«Memleket basshysy Qasym-Jomart Kemeluly Toqaev 1 qyrkúıekte halyqqa Joldaýyn jarıalap, tyń bastamalar kóterdi. Sonyń ishinde, bıylǵy kúzde kezekten tys Prezıdent saılaýyn ótkizý týraly aıtty. Bul usynys sarapshylar ǵana emes, búkil qoǵam tarapynan qyzý pikir-talas týdyryp jatyr. Ony Parlament Májilisindegi «Jańa Qazaqstan» depýtattyq tobynyń músheleri de talqylady. Osyǵan oraı oıymyzdy ortaǵa salýdy jón kórdik»,- dep atap ótti depýtat óz málimdemesinde.
Edil Jańbyrshın bastaǵan depýtattar toby ár máselege jeke-jeke toqtaldy.
Birinshi. Bıyl elimizde konstıtýsıalyq reforma qolǵa alyndy. Jańa, Ádiletti Qazaqstan quramyz,
«Ekinshi Respýblıka» modeline kóshemiz dep jarıaladyq. Memlekettik júıeni, sonyń ishinde memleket basqarý isin jańǵyrtý qajet ekeni daýsyz. Iaǵnı, bul – demokratıalyq basqarý modeline kóshýge jol ashatyn bastama. Sondyqtan, qaıta saılaný quqyǵynsyz 7 jyldyq bir merzimdi engizý durys bastama. Eshkim Prezıdent bıligin uzaq jyldar boıy ıemdenbeıdi. Bul elimizdiń sýperprezıdenttik bılikten tolyq ketkenimizdi bekite túsedi.
Ekinshi. Qazir álemdegi keıbir elderde memleket basshysynyń ókilettigin uzartý boıynsha bastamalar kóterilip jatqan tusta, bizdiń elimizde kerisinshe Prezıdent ókilettigin qaıta saılaný quqyǵynsyz 7 jyldyq bir merzimmen shekteý – elimizdiń demokratıalyq baǵytty berik ustanǵanyn kórsetedi.
Úshinshiden, eger Prezıdent kezekten tys saılaýda 5 jylǵa saılanyp, sodan soń 7 jyldyq merzimdi engizetin bolsa, onda qazirgi Prezıdenttiń úshinshi merzimge saılanýyna quqyqtyq negizder paıda bolýy múmkin degen ártúrli alyp-qashpa pikir aıtylýda.
Sondyqtan qazirgi Prezıdent 5 jyldan keıin taǵy da 7 jylǵa barýy múmkin degen kúmándi seıiltý úshin bıyl birden 7 jyldyq merzimge saılanǵany durys bolar edi dep oılaımyz. Sonda atalǵan quqyqtyq kollızıa týyndamaıdy.
Onyń ústine, Memleket basshysy kezekten tys saılaý ótkizbeı, eki merzimge saılansa da, bıyl kezekten tys saılaýda 7 jylǵa saılansa da, onyń ókilettik merzimi 2029 jyly aıaqtalady. Iaǵnı qazirgi Prezıdent merziminiń uzaqtyǵy ózgerissiz qalady.
Tórtinshi. Biz, burynǵy júıeni qalyptastyrǵan saıası kúshterdiń, yqpaldy top ókilderiniń bılikke umtylyp otyrǵanyn umytpaýymyz qajet. Prezıdenttiń qazir saılaý ótkizip jáne jeti jyl merzimge saılanýy memleketimizdiń qaýipsizdigi men turaqtylyǵyn qamtamasyz etýge múmkindik beredi. Ol jańa ınklúzıvti azamattyq qoǵam qurýǵa múmkindik alady.
Osy jaǵdaılardyń bárin eskere otyryp, «Jańa Qazaqstan» depýtattyq toby mynadaı málimdeme jasaıdy:
Birinshiden, biz Qazaqstan Respýblıkasy Prezıdentin jeti jylǵa bir merzimge saılaý bastamasyn qoldaımyz.
Ekinshiden, Konstıtýsıaǵa ózgeristerdi qazir engizip, Prezıdent saılaýyn jańa talaptarǵa sáıkes osy jyldyń kúzinde ótkizý qajet dep sanaımyz.
Jalpy, bul memlekettik basqarý júıesin jańǵyrtyp, elimizdi ornyqty damytýǵa jol ashatyn mańyzdy qadam.
Úshinshiden, Konstıtýsıamyzǵa ózgeris engizetin bolsaq, onda osy múmkindikti paıdalana otyryp, Ata Zańǵa taǵy bir asa mańyzdy máseleni engizý kerek. Ol – elordanyń atyn qaıta qaıtarý. Adamnyń kózi tirisinde qalaǵa onyń esimin bergen durys dep eseptemeımiz jáne de qalanyń jańa ataýyn halyqta qabyldamady.
«Sondyqtan Tuńǵysh Prezıdenttiń ózi usynǵan Astana ataýyn qaıta qalpyna keltirý tarıhı ádildik bolar edi. Bul Tuńǵysh Prezıdenttiń bas qalamyzdyń qurylysyn saldyrýdaǵy eńbegin de baǵalaý jáne halqymyzdyń usynys-pikirin de eskerý. Qadirli aǵaıyn! Qaı zamanda da el basyna kún týǵanda, halqymyz bir basshynyń aınalasyna toptasyp, qıyndyqtardan da, synaqtardan da aman-saý shyqqan. Qazaqta «Altaý ala bolsa aýyzdaǵy ketedi, tórteý túgel bolsa tóbedegi keledi» degen jaqsy sóz bar. Qazir – arazdasatyn ýaqyt emes, birigetin ýaqyt, talasatyn ýaqyt emes, tatýlasatyn ýaqyt! Sondyqtan barsha kózi ashyq, kókiregi oıaý azamattarymyz birlesip, Otanymyzdy aldaǵy synaqtardan abyroımen alyp shyǵaıyq», - dep aıaqtalady halyq qalaýlysynyń málimdemesi.