Prezıdenttikke kandıdat Qaraqat Ábdenniń Qyzylorda oblysyndaǵy saılaýaldy kezdesýleri ótti. Ol jaqyn jáne shalǵaı jatqan eldimekenderdiń jaǵdaıymen tanysyp, Aral qalasyna at basyn burdy, dep habarlaıdy Almaty-akshamy.kz.
Oblystaǵy úlken aımaqtardyń biri bolyp sanalatyn Aral qalasynda ol jergilikti halyqpen júzdesip, saılaýaldy baǵdarlamasyn tanystyrdy. Budan bólek, kandıdat osy óńirde ulttyq jáne otbasylyq qundylyqtardy negizge alyp, kásibin dóńgeletip otyrǵan otbasylyq bıznes ókilderimen kezdesti.
Aralda qozǵalǵan mańyzdy taqyryptar Qyzylorda qalasyndaǵy kezdesýde jalǵasyn tapty. Jıyn barysynda qoǵamdaǵy ózekti máseleler, óskeleń urpaq pen jastar tárbıesi, otbasy ınstıtýnyń máni talqylandy. Kandıdat qoǵamnyń dertine aınalǵan sıntetıkalyq esirtki, qumar oıyndar men jat mádenıetke eliktegish jastardyń áreketterine erekshe toqtaldy. Onyń aıtýynsha, buǵan ulttyq qundylyqtardyń tıisti deńgeıde nasıhattalmaýy, otbasy tárbıesiniń álsireýi sebep.
Eske salsaq, elimizde 20 qarasha kúni kezekten tys prezıdent saılaýy ótedi. Úmitker Q.Ábden el aımaqtaryn aralap, 13 qala men birneshe aýyldyq eldimekende 20-dan astam kezdesý ótkizdi Aldaǵy ýaqytta ol Soltústik Qazaqstan, Túrkistan, Jambyl oblystarynyń saılaýshylarymen kezdesý ótkizedi.