Qupıa qujattamany joıýǵa zańsyz buıryq bergen
Taldyqorǵan qalalyq sotynda laýazymdy adamnyń óz quqyqtary men ókilettikterinen tys jáne aýyr zardaptarǵa ákelip soqqan bılik pen laýazymdyq ókilettikterdi asyra paıdalanýy faktisi (QR QK-niń 362-babynyń 4-bóligi) boıynsha K-ge qatysty is qaraldy, dep habarlaıdy Almaty-akshamy.kz.
"Sotpen anyqtalǵandaı, K. Almaty oblysy UQKD bastyǵy bola tura, óziniń laýazymdyq ókilettiginen asyra paıdalana otyryp, 2022 jylǵy 5 qańtarda oryn alǵan oqıǵalardy eskere otyryp, óziniń laýazymdyq mindetterin elemeı, jeke quramǵa departament ǵımaratyn qorǵaý jóninde sharalar qoldanbaýǵa; ákimshilik ǵımarattan ketýge; qyzmettik jáne qupıa qujattamany joıýǵa jáne turǵylyqty jerlerine taraýǵa zańsyz buıryq bergen, nátıjesinde keıinnen UQKD ǵımaratyn basyp alýǵa ákelip soqtyrdy ("qupıa" degen belgige baılanysty basqa mán-jaılardy jarıa etý múmkin emes)", - delingen Taldyqorǵan qalalyq soty taratqan málimette.
Sot úkimimen K. 362-baptyń 4-bóligi boıynsha kináli dep tanyldy jáne oǵan 10 jyl merzimge quqyq qorǵaý organdarynda belgili bir laýazymdardy atqarý quqyǵynan aıyra otyryp, 6 jylǵa bas bostandyǵynan aıyrý jazasy taǵaıyndalǵany da naqtylanady.
"Qazaqstan Respýblıkasynyń Prezıdentine K.-ge qatysty Ulttyq qaýipsizdik general-maıory arnaýly ataǵynan jáne memlekettik nagradalar men ordenderden aıyrý týraly usynys engizildi. Sot úkimi zańdy kúshine engen joq", - delingen habarlamada.