Saýda aınalymy qalpyna tústi.
Birinshi toqsannyń qorytyndysy boıynsha, bólshek saýda kólemi 737,8 mlrd teńgeni, kóterme saýda aınalymy 2,4 trln teńgeni qurady. Bul týraly 3 mamyr kúni qalalyq kásipkerlik jáne ınvestısıalar basqarmasynyń basshysy Erkebulan Orazalın brıfıńte aıtty, dep habarlaıdy Almaty-akshamy.kz.
«Ózderińizge belgili, Almatydaǵy óńirlik komısıa bızneske keltirilgen zalaldy dereý óteýge kiristi. Búgingi tańda komısıa jalpy somasy 11 mlrd teńgeden (11 045,9 mln. tg) astam 1499 ótinimdi maquldady. Zardap shekken kásipkerlerdiń 95%-y ótemaqy aldy. Búgin olar kelýshilerge esigin aıqara ashyp, ádettegi qyzmetin qaıta bastap ketti. Komısıanyń qaraýynda saraptama júrgizýdi, JSQ ázirleýdi jáne rastaıtyn qujattardy qalpyna keltirýdi talap etetin eń kúrdeli jaǵdaılar qaldy. Bızneske keltirilgen zalaldy óteý jumystaryn aǵymdaǵy jyldyń mamyr aıynda aıaqtaýdy josparlap otyrmyz», - dedi Erkebulan Orazalın.
Mamandardyń aıtýynsha, tutastaı alǵanda, Almatydaǵy shaǵyn jáne orta bıznes óziniń utqyrlyǵy men ıkemdiligine baılanysty jańa jaǵdaıǵa tez beıimdele alady. Jyldyń alǵashqy úsh aıynyń qorytyndysy boıynsha, biz jeke kásipkerlikte jaqsy ósý áleýetin baıqadyq. Máselen, jumys istep turǵan SHOB sýbektileriniń sany 2021 jyldyń sáıkes kezeńimen salystyrǵanda 10,5%-ǵa ósip, 217 822 birlikti qurady.
«Bizdiń eń mańyzdy mindetterimizdiń biri – kásipkerlerge kóleńkeden shyǵýǵa kómektesý jáne azamattardy belsendi ekonomıkalyq qyzmetke tartý. Ol úshin biz dástúrli saýdany zamanaýı órkenıetti formatqa aýystyramyz», - dedi qalalyq kásipkerlik jáne ınvestısıalar basqarmasynyń basshysy Erkebulan Orazalın.