Almatynyń jasyl ekonomıka basqarmasy bul aqparatty joqqa shyǵardy.
Tanymal qazaqstandyq sportshy Qýat Hamıtov óziniń Instagram paraqshasynda qarańǵy ýaqytta jol boıynda ósip turǵan aǵashtardy sýaryp kele jatqan traktordyń vıdeosyn jarıalaǵan. Kadr syrtyndaǵy daýys adamdardy osylaı «ýlaıdy», adamdardyń aýyratyny da sondyqtan deıdi. Bul jalǵan, dep habarlady stopfake.kz.
Almatynyń jasyl ekonomıka basqarmasy bul aqparatty joqqa shyǵardy.
– Joǵaryda kórsetilgen mekenjaı boıynsha «Dezınfeksıa» mekemesi jasyl jelekterdi zıankesterden bıologıalyq preparattarmen óńdeý boıynsha jumystar júrgizýde. Jumys tıimdi bolýy úshin túngi ýaqytta júrgiziledi, óıtkeni bıologıalyq preparat últrakúlgin sáýlelerdiń áserinen tıimdiligin joǵaltady, – dep jazdy departament ókilderi sportshynyń paraqshasyndaǵy postqa qatysty jazǵan pikirinde.
Almaty qalasynyń sanıtarlyq-epıdemıologıalyq baqylaý departamenti de túsinikteme berdi. Vedomstvo aǵashtardy zıankester men aýrýlardan qorǵaý boıynsha is-sharalar qalada jyl saıyn ótkiziledi jáne bul úshin eń tıimdi quraldardyń biri bıopreparattar bolyp tabylatynyn habarlady.
– Bıologıalyq ónimder – tiri organızmder nemese tiri organızmder sıntezdeıtin tabıǵı bıologıalyq qosylystar. Bıologıalyq preparattardyń spektri bıoınsektısıdterden, bıofýngısıdterden bıo-tyńaıtqyshtarǵa deıin óte aýqymdy. Sańyraýqulaqtarǵa negizdelgen bıopestısıdter tamyr, tuqym jáne topyraq ınfeksıasynyń qozdyrǵyshtaryn basýǵa, sondaı-aq preparatty tikeleı betine qoldanǵan kezde jemis pen japyraq aýrýlarynyń damýyna jol bermeıdi. Bıologıalyq ınsektısıdter tórt júz túrli jándikterge qarsy tıimdi. Preparattyń áseri qarapaıym – ishki aǵzalardy zaqymdaıdy, jándikterdiń sal aýrýyna jáne ólimine ákep soqtyrady, – delingen Almaty qalasynyń sanıtarlyq-epıdemıologıalyq baqylaý departamentiniń túsiniktemesinde.
Aralas jekpe-jek jaýyngeri Qýat Hamıtov buǵan deıin jalǵan aqparat taratqan bolatyn. Óziniń Instagram paraqshasynda ol COVID-dıssıdentterdi belsendi túrde qoldap, aýrýdyń bar ekenin joqqa shyǵardy.