Mundaı shekteý túngi ýaqytta júretin motosıklshilerge qatysty bolmaq
Almatyda túngi ýaqytta motosıkl qozǵalysyn shekteý qarastyrylýda, dep habarlaıdy Almaty-akshamy.kz Almaty.tv saıtyna silteme jasap.
Oǵan bul transport ıeleriniń qala kóshelerinde erkin qozǵalyp, jańǵyrǵan dybysymen almatylyqtardyń tún uıqysyn bólýi sebep bolǵan. Eger tıisti qaýly kúshine ense, qos dóńgelekti kóliktiń qozǵalysyna túngi saǵat 10-nan tańǵy 9-ǵa deıin tyıym salynady.
Almatyda 6,5 myńdaı motosıkl resmı tirkelgen. Olardyń qozǵalysynan tún uıqymyz tórt bólinedi dep shaǵymdanatyn qala turǵyndarynyń sany da artqan. Bul rette qalalyq ákimdik pen polısıa departamenti motosıkl qozǵalysyn túngi ýaqytta shekteýdi usyndy. Bul bastamany almatylyqtardyń basym bóligi qoldap otyr.
«Túngi saǵat 11-den keıin adamdar demalady, uıyqtaıdy. Olar daryldatyp, uıqy da, maza da bermeıdi. Sondyqtan osy sheshim óte durys boldy», – deıdi qala turǵyny Temirhan Qaptaǵaev.
«Men turatyn úıdiń kóshesinde motosıklder kóp júredi. Ásirese, keshki ýaqytta adamnyń uıqysyn buzady. Adam jaqsy uıyqtap turýy kerek», – deıdi taǵy bir turǵyn Qosaı Aıtbek.
Al qos dóńgelekti kólik ıeleriniń buǵan óz ýáji bar. Aıtýlarynsha, eger mundaı qaýly kúshine ense, olardyń quqyǵy taptalady. «Shýlap júrgen biz ǵana emespiz» degen baıkerler óz petısıasyn qurmaq nıette.
«Dybystyq rejımdi tek baıkerler buzady deý mıǵa syımaıtyn nárse. Bizde basqa da erekshe transport túrin tizgindegen turǵyndar kóp. Onymen qosa, arnaıy qatty shýlaıtyn tehnıkalar da bar. Onda olarǵa da tyıym salynsyn. Megapolıste tolyǵymen tynysh bolýy múmkin emes. Munymen árkim jeke kúresýi kerek», – deıdi qala turǵyny Ivan Nevánsev.
Qalalyq mobıldilik basqarmasynyń bastamasymen bul máseleni Kólik jáne komýnıkasıa ǵylymı zertteý ınstıtýty jan-jaqty zerttep kórdi. Orta eseppen árbir motosıkldiń dybys deńgeıi 81 men 89 desıbel arasynda eken. Ǵalymdar bul adamnyń júrek qaǵysyn jıiletip, qan qysymyn kóteredi jáne estý shegin tómendetedi degen toqtamǵa kelgen.
Motosıkldiń dybys deńgeıi bir táýlik boıy magıstraldy joldar men ashyq jáne jabyq terezeleri bar bólmelerde zertteldi. Avtokólik túrleriniń ishindegi eń shýlysy – júk kóligi men men motosıklder. Olar adam aǵzasyna teris áser etedi.
Aıta ketetini, turǵyn úı-jaılarda tipti ruqsat etilgen normadan asatyn qysqa merzimdi qatty dybys deńgeıi adamǵa teris áser etýi múmkin. Ásirese, qart adamdar men kishkentaı balalary bar otbasylarǵa zıan.
Instıtýt ǵalymdary qos dóńgelekti kóliktiń qatysýymen bolatyn jol-kólik apatynyń jıilep ketý deregin de negizge aldy. Máselen, sońǵy 4 jylda motosıkl saldarynan bolatyn ólim-jitim sany 5 paıyzdan 8 paıyzǵa artqan.
Jańa qaýly qazir Ashyq normatıvtik quqyqtyq aktiler portalynda talqylanyp jatyr. Árbir azamat saıtqa kirip, óz pikirin bólise alady. Daýys berý 12 qazanǵa deıin jalǵasady.