Almaty ákimdigi egde jastaǵy adamdardyń ómir súrý deńgeıi men sapasyn arttyrýǵa qamqorlyq jasaıdy. 2018 jyldan bastap megapolıste «Belsendi uzaq ómir» ("Aktıvnoe dolgoletıe") jol kartasy júzege asyrylýda. Joba aǵa býyn ókilderi arasynda úlken suranysqa ıe. Belsendi uzaq ómir súrýdiń 9 ortalyǵynda qatysýshylar pikirlesterin tabady, ýaqytyn qyzyqty ótkizedi, jańa nárseni úırenedi. Bul jumys týraly Almaty qalasy áleýmettik ál-aýqat basqarmasy basshysy orynbasarynyń mindetin atqarýshy Jánibek Qarataev aıtyp berdi, dep habarlaıdy almaty-akshamy.kz
Jánibek Qarataev atap ótkendeı, bul ortalyqtar aǵylshyn tilin oqyp, kompúterlik saýattylyq kýrstarynan ótip, emdik dene shynyqtyrýmen, bımen jáne basqamen aınalysýǵa múmkindik beretin demalys mekemeleri bolyp tabylady. Nátıjesinde qart adamdardyń qoǵamdyq belsendiligi artady jáne olardyń psıhıkalyq-emosıonaldy jaǵdaıy jaqsarady.
«Jol kartasynyń irgetasy qaladaǵy alǵashqy Belsendi uzaq ómir súrý ortalyǵynyń ashylýy boldy. Búginde qalada toǵyz Belsendi uzaq ómir súrý ortalyǵy qyzmet kórsetedi, ıaǵnı mundaı ortalyqtar barlyq aýdandarda jumys isteıdi. Olarǵa kún saıyn 1 myńnan astam adam keledi», - dedi áleýmettik ál-aýqat basqarmasy basshysynyń orynbasary.
Onyń aıtýynsha, ortalyqta qart adamdarǵa túrli qyzmetter men demalys túrleri usynylady. Bul - ómirlik tonýs pen densaýlyqty saqtaý úshin dárigerlerdiń keńesteri, psıhologtarmen áńgimeler, kýrstarda oqytý, dene shynyqtyrý. Zeınetkerler qolóner, mýzyka jáne bı, qazaq jáne aǵylshyn tili sabaqtaryna, kompúterlik kýrstarǵa qatysa alady. Olardy murajaılarǵa, teatrlarǵa, kórmelerge, kınolarǵa barý uıymdastyrylyp, merekeler ótkiziledi.
Sonymen qatar, zeınetkerler bos ýaqyttarynda shahmat, nardy, domıno oınaıdy, sýret salý, keskindeme jáne grafıka, ósimdik sharýashylyǵy, qolóner, sondaı-aq jadyny nyǵaıtý tehnıkasy bar. Ortalyqtardaǵy barlyq is-sharalar sanıtarlyq-epıdemıologıalyq normalardy saqtaı otyryp júrgiziledi.
«Shamamen 13 500 qart almatylyq emdik ıogamen, skandınavıalyq júrispen, EDSH aınalysady. Bul qyzmet túri, ásirese, zeınetkerler arasynda tanymal. Zeınetkerler keńes alý úshin gerontolog, kenezıolog-psıhologtarǵa júgine alady», - dedi Jánibek Qarataev.
Ashylǵan kúnnen bastap qazirgi ýaqytqa deıin ortalyqtarda 25 myńnan astam zeınetker tirkelgen, 274 myń qyzmet kórsetilgen.
Áleýmettik ál-aýqat basqarmasynyń ókili jergilikti atqarýshy organdardyń qoldaýymen bıyl 500-den astam zeınetker úshin Esik, Qapshaǵaı qalalaryna, Oı-qaraǵaıǵa, Qaskeleń shatqalyna týrısik saparlar uıymdastyrylǵanyn aıtty.
Aǵymdaǵy jyldyń shilde aıynan bastap belsendi uzaq ómir súrý ortalyqtarynda «qum art-terapıa» tehnıkasy kýrsy júrgizilýde. Bul psıhoterapıa ádisteriniń biri - ishki kerneýdi jeńildetý ádisi. Qarttar úshin psıhıkalyq-emosıonaldy jaıly orta jasaý. Atalǵan kýrsqa elýden astam egde azamattar qatysty.