Qaıyrymdylyq jasaýǵa jas kedergi emes. Almaty qalasynyń kez kelgen turǵyny erikti bola alady. Bul týraly Óńirlik komýnıkasıalar qyzmetinde ótken brıfıńte qalalyq áleýmettik ál-aýqat basqarmasy basshysynyń orynbasary mindetin atqarýshy Jánibek Qarataev málim etti. Ol megapolıste 200-den astam zeınetker óskeleń urpaq úshin sabaq ótkizip jatqanyn atap ótti, dep habarlaıdy almaty-akshamy.kz
«Egde jastaǵy eriktiler arasynda ómir boıy jumys istep júrgender de az emes. Sondyqtan 2020 jyly qala ákimi Baqytjan Saǵyntaevtyń bastamasy boıynsha «Shyńǵa órleý» áleýmettik klýby» jobasy iske qosyldy. Maqsaty – turmysy tómen jáne kóp balaly otbasylardan shyqqan tómengi synyp oqýshylary men erekshe qajettiligi bar balalarǵa ómirlik tájirıbesin, bilimi men daǵdylaryn berý úshin aǵa býyn men múgedek adamdardy qoǵamdyq ómirge tartý», - deıdi Jánibek Qarataev.
Qala ákiminiń tapsyrmasy boıynsha jáne "Shetsiz qala" baǵdarlamasy aıasynda klýb Almatynyń ár aýdanynda ashyldy. Búgingi tańda 11 «Shyńǵa órleý» áleýmettik klýby jumys isteıdi.
Onda zeınetkerler men múgedektigi bar adamdardan turatyn 203 pedagog jumys isteıdi. Olar bastaýysh mekteptiń negizgi jalpy bilim beretin pánderi boıynsha avtorlyq sabaqtar (matematıka, qazaq tili, orys tili, aǵylshyn tili, IT-tehnologıa), sondaı-aq qosymsha bilim berýdiń shyǵarmashylyq jáne sporttyq sabaqtary (shahmat, qolóner, horeografıa, mýzyka, akterlik sheberlik) usynady. 9 aıdyń qorytyndysy boıynsha 2,2 myńǵa jýyq bala oqytýdan ótti.
Jánibek Qarataev Almatyda jalǵyz basty zeınetkerler, múgedekter, jalǵyz basty erli-zaıypty jáne egde jastaǵy otbasylyq juptar úshin áleýmettik turǵyn úı jumys isteıtinin, qazirgi ýaqytta 51 adam turatynyn habarlady. Sondaı-aq, «Shańyraq» áleýmettik qyzmetter ortalyǵy, burynǵy Ardagerler úıi jumys isteıdi, onda 288 adam qamtylǵan.
Sonymen qatar, aýdandyq ákimdikter janynda áleýmettik qyzmetkerler jalǵyz turatyn zeınetkerler men múgedekterge qyzmet kórsetedi. Barlyǵy 2 773 qart adamǵa kútim kórsetiledi.
Almatyda jasy boıynsha zeınetkerlerge jol aqysyna 50% jeńildik beriledi, al 75 jastan asqan turǵyndar qalalyq qoǵamdyq kólikte tegin júredi.