Almatydaǵy Qarken Ahmetov atyndaǵy mektep-ınternat-kolledj ujymy men oqýshylary Naýryz merekesine oraı erekshe shara ótkizdi. 15 naýryz – Qaıyrymdylyq kúnine baılanysty olar múmkindigi shekteýli úsh balanyń úı ishine kómek kórsetti.
Kolejdiń tárbıeshisi Gúlmıra Jeldibaeva atap ótkendeı, bul ıgi is jyl saıyn dástúrli túrde ótkiziledi. Bıylǵy shara aıasynda kómek Medeý aýdandyq áleýmettik qorǵaý bóliminde tirkelgen úsh balaǵa baǵyttaldy.
Bul balalar mektepke barmaıdy, úıden bilim alady. Olardyń otbasylaryna materıaldyq jáne moraldyq qoldaý kórsetý maqsatynda mektep-ınternat-kolledjdiń qyzmetkerleri men oqýshylary birlese qaıyrymdylyq sharasyn uıymdastyrdy.
«Bizde arnaıy uıym bar, onyń basynda oqýshylardan saılanǵan kóshbasshylar turady. Olar árbir sharany muqıat uıymdastyryp, oqýshylar men ujym arasynan qarajat jınaýǵa kómektesedi. Bıyl da barlyǵymyz ózimizdiń shama-sharqymyzǵa qaraı úles qostyq», – deıdi Gúlmıra Jeldibaeva.
Bul qaıyrymdylyq sharasy balalardyń ata-analaryna da úlken qýanysh syılady. Solardyń biri – Aıdana Telibaeva óz alǵysyn bildirdi:
“Osyndaı sharalar bizge úlken demeý. Balamyz erekshe kútimdi qajet etedi, sondyqtan árbir qoldaý biz úshin óte mańyzdy. Qarken Ahmetov atyndaǵy mektep-ınternat-kolledj ujymyna, oqýshylaryna jáne barlyq qatysqan jandarǵa shyn júrekten raqmet aıtamyn. Sizderdiń meıirimderińiz bizge jiger beredi. Mundaı qaıyrymdylyq sharalary qoǵamda meıirimdilik pen janashyrlyqtyń bar ekenin kórsetedi. Barshańyzǵa amandyq pen jaqsylyq tileımin!”
Qaıyrymdylyq – tek materıaldyq kómek qana emes, júrekten shyqqan shynaıy meıirim. Osyndaı ıgi bastamalar kómekke muqtaj jandarǵa úmit syılap, qoǵamdaǵy izgilik pen birlikti nyǵaıtady.