Almatyda áıgili akter Djekı Channyń júrgeni jaıly aqparat áleýmettik jelide qyzý talqylanyp jatyr, dep habarlaıdy Aqshamnews.kz tilshisi.
23 qyrkúıekte túsirilgen foto men beınejazbalarda Djekı Chanǵa uqsaıtyn adam Almaty halyqaralyq áýejaıynda baıqalǵan. Jeli qoldanýshylary akterdi Salem Entertainment kompanıasynyń ókilderimen birge kórip qalǵanyn aıtady. Sodan beri onyń kelý sebebi jaıly túrli boljam jasalyp jatyr.
Eń keń taraǵan nusqalardyń biri - Djekı Chan Qazaqstanǵa jańa fılmniń túsirilimi úshin kelgen bolýy múmkin. Keıbir pikirlerge súıensek, ol qazaqstandyq medıakompanıa Salem Entertainment-pen iri halyqaralyq jobada seriktes bolýy yqtımal. Taǵy bir nusqa boıynsha, akter aldaǵy ýaqytta ótetin "Qaırat" pen "Real Madrıd" arasyndaǵy machiniń qurmetti qonaǵy bolýy múmkin degen joramaldar aıtylyp jatyr.
Alaıda ázirge bul aqparatqa qatysty resmı rastaý joq. Salem Entertainment kompanıasy da, fýtbol klýbtarynyń ókilderi de eshqandaı pikir bildirmedi. Almaty ákimdigi men mádenıet mekemeleri tarapynan da resmı túsinikteme berilgen joq.
Aıta keteıik, buǵan deıin Salem Entertainment kompanıasynyń bas dırektory Igor Saı Qazaqstanda halyqaralyq kınojobalar júzege asyrylyp jatqanyn, sonyń ishinde Djekı Chan jáne amerıkalyq prodúserlermen birlesken jumystar bar ekenin málimdegen edi. Onyń sózinshe, kompanıa jyl saıyn ondaǵan serıal men birneshe tolyqmetrajdy fılm túsiredi jáne sheteldik seriktestermen baılanysyn keńeıtip jatyr.
Degenmen dál qazir Djekı Channyń Almatyǵa kelýiniń naqty maqsaty belgisiz. Aqparatty eshbir resmı derekkóz rastamaǵandyqtan, áleýmettik jelidegi boljamdar ázirge tek qaýeset kúıinde qalyp otyr.