Almatyda «Qaırat» pen «Real» arasyndaǵy tarıhı mach aıaqtaldy. Oıyn nátıjesi boıynsha ıspandyqtar iri eseppen jeńdi, dep habarlaıdy Aqshamnews.kz tilshisi.
Almatyda UEFA Chempıondar lıgasynyń jalpy kezeńindegi tarıhı kezdesý ótti. Jergilikti «Qaırat» áıgili madrıdtik «Realǵa» qarsy alǵash ret óz alańynda oınap, 0:5 esebimen jeńilip qaldy.
Mach ekinshi týr aıasynda ótti. Oıynnyń alǵashqy mınýttarynan-aq qos komandanyń basty juldyzdary alańǵa shyqty: Kılıan Mbappe, Vınısıýs Jýnıor, Dastan Sátpaev pen Sherhan Qalmurza.
Alǵashqy taım - Mbappeniń penaltıi
25-mınýtta fransýz shabýylshysy Kılıan Mbappe penaltıden esep ashty. Osylaısha birinshi taım «Realdyń» paıdasyna 0:1 esebimen aıaqtaldy.
Ekinshi taımda «Real» qarqynyn kúsheıtti
Úzilisten keıin madrıdtikter tolyq basymdyqqa ıe boldy. 52 jáne 74-mınýttarda taǵy da Mbappe mergendigimen kózge túsip, het-trık jasady - 0:3. Osy aralyqta «Qaıratqa» penaltı belgilengen edi, biraq VAR sheshiminen keıin tóreshi aıyp dobyn alyp tastady.
Jergilikti komandanyń bas bapkeri Rafael Ýrazbahtın oıyn barysyn ózgertý úshin birneshe almastyrý jasady. Baıbek, Edmılson, Stanoev, Rıkardıno jáne jaraqattan keıin alańǵa alǵash shyqqan Zarıa oıyndy kúsheıtýge tyrysty. Degenmen ózgerister nátıje bermedi.
83-mınýtta Edýardo Kamavınga tórtinshi goldy soqty. Qosymsha ýaqytta Braım Dıas núkte qoıyp, esepti 0:5-ke jetkizdi.
Tarıhı kezdesý
Bul mach madrıdtik «Realdyń» Qazaqstandaǵy alǵashqy oıyny boldy. Al «Qaırat» úshin Eýropanyń eń tıtýldy klýbymen óz alańynda alǵash ret kezdesýdiń ózi úlken oqıǵaǵa aınaldy.
Degenmen oıyn barysynda qazaqstandyq jankúıerler onlaın-translásıa sapasyna narazylyq bildirdi.
sýretter: Samat Qusaıynov