Arnaıy qaýly qabyldandy.
Búgin QR Ortalyq saılaý komısıasy 20 qarashada ótetin kezekten tys Prezıdent saılaýyna kandıdattardyń memlekettik tildi erkin meńgergenin anyqtaıtyn komısıa qurý týraly qaýly qabyldady, dep habarlaıdy Almaty-akshamy.kz QazAqparatqa silteme jasap.
«QR Prezıdenttigine kandıdattyń memlekettik tildi jetik meńgerýi QR Konstıtýsıasynyń 41-baby boıynsha lıngvısıkalyq komısıanyń qaýlysymen anyqtalady. OSK-nyń osy másele boıynsha quzireti «QR-daǵy Saılaý týraly» Konstıtýsıalyq zańnyń 54-babynyń 2-tarmaǵynda kórsetilgen. Naqtyraq aıtqanda, osy bapqa sáıkes, Konstıtýtsıanyń 41-babynyń 2-tarmaǵyn resmı túsindirý týraly Konstıtýsıalyq keńestiń sheshimi boıynsha memlekettik tildi bilýdegi kandıdattyń biliktiligin anyqtaý Ortalyq saılaý komısıasynyń sheshimimen aıqyndalady. QR Konstıtýsıasynyń 41-baby 2- tarmaǵyn resmı túsindirý týraly Konstıtýsıalyq keńestiń 1998 jylǵy 9 qazandaǵy №280 qaýlysyna sáıkes, QR Konstıtýsıasynyń 41-baby 2-tarmaǵy normasynyń memlekettik tildi erkin meńgergen degen bóliginde «qazaq tilinde saýatty túrde oqıdy, jazady, óz oıyn qınalmaı ońaı jetkizedi jáne kópshilik aldynda sóıleı alady» dep aıtylǵan», - dedi QR Ortalyq saılaý komısıasynyń hatshysy Muhtar Erman OSK otyrysynda.
Onyń atap ótýinshe, QR Prezıdenttigine kandıdattyń memlekettik tilde erkin meńgergenin anyqtaý OSK-nyń qaýlysyna sáıkes, quramy keminde 5 adamnan quralǵan mamandar kiretin lıngvısıkalyq komısıanyń qorytyndysymen aıqyndalady.
«OSK-nyń QR Prezıdenttigine kandıdattyń memlekettik tildi erkin meńgergenin anyqtaý rásimi týraly 2005 jylǵy 31 tamyzdaǵy №12/26 arnaıy qaýlysy bar. QR Prezıdenttigine kandıdattyń memlekettik tildi erkin meńgergenin anyqtaý úshin birinshi, lıngvısıkalyq komısıa usynǵan taqyryp boıynsha kólemi 2 betten aspaıtyn jazbasha tapsyrma jazady. Ekinshi, lıngvısıkalyq komısıa usynǵan kólemi 3 betten aspaıtyn mátindi oqý. Úshinshi, lıngvıskalyq komısıa usynǵan taqyryp boıynsha kópshilik aldynda 15 mınýttan kem emes sóz sóıleý talap etiledi», - dedi ol.