Munaı tasymaldaýdyń eń tıimdi baǵyty.
QR Energetıka mınıstri Bolat Aqsholaqov 15 qazanǵa deıin Kaspıı qubyr konsorsıýmy (KQK) eki jyljymaly aılaq qurylǵysyn iske qosýdy josparlap otyrǵanyn aıtty, dep habarlaıdy Almaty-akshamy.kz QazAqparatqa silteme jasap.
«Kaspıı qubyr konsorsıýmyna (KQK) keletin bolsaq, qalqymaly sısternalardy aýystyrýy tıis merdigerlermen máseleler sheshildi. Birinshi qashyqtan baılaý qurylǵysy shamamen 10 qazanda aýystyrylady. Ekinshisi 15 qazanǵa deıin, ıaǵnı úsh qashyqtan baılaý qondyryǵysy tolyq iske qosylýy tıis», - dedi Bolat Aqsholaqov.
Mınıstr KQK qazaqstandyq munaı tasymaldaýdyń eń tıimdi baǵyty ekenin aıtty. Onyń pikirinshe, basqa joldar qarajat jaǵynan tıimdi emes, biraq báribir munaıdy eksporttaýǵa múmkindik beredi. Bolat Aqsholaqov «Qashaǵandaǵy» jóndeý jumystaryna qatysty saýalǵa da jaýap berdi.
«Qashaǵandaǵy jóndeý jumystarynyń birneshe sheshimi bar. Qazan aıynyń 20-na qaraı ken orny burynǵy óndirý rejımine – táýligine 400 myń barel óndirýge oralady. Eger 15-20 qazanǵa deıin Kaspıı qubyr konsorsıýmy men «Qashaǵan» jumysyn bastasa, onda múlde problema joq», - dedi Bolat Aqsholaqov.
Aıtýynsha, iri ken ornyndaǵy jóndeý jumystaryna baılanysty táýligine 200 myń barel shyǵyn kelgen.
Buǵan deıin mınıstr «KIOGE-2022» halyqaralyq munaı jáne gaz kórme-konferensıasy barysynda elimizdiń energetıka salasyn damytýdyń basym baǵyttarynyń biri munaı-gaz-hımıa salasy ekenin aıtty.
Eske salsaq, maýsym aıynda Kaspıı qubyr konsorsıýmynyń munaı tasymaldaıtyn 2 qurylǵysy jumysyn ýaqytsha toqtatqan bolatyn.