Qoljetimdi shıkizat qalaı da jetkiliksiz.
Prezıdent Qasym-Jomart Toqaev «Altyn sapa» jáne «Paryz» syılyqtarynyń ıegerlerin marapattaý saltanatynda sóılegen sózinde otandyq óńdeýshilerdiń basyndaǵy mańyzdy problemany atady, dep habarlaıdy Almaty-akshamy.kz QazAqparatqa silteme jasap.
«Úshinshi – Qazaqstanda shynaıy ındýstrıalandyrýǵa qolaıly jaǵdaı tabandy túrde jasalyp jatyr. Ónerkásip saıasaty týraly arnaıy zań qabyldandy. Ol joǵary jáne orta bólinistegi ónimderdi óndirýshilerdi qoldaý sharalarynyń keń paketin usynady. Alaıda onyń keıbir zańnama normalary áli de kesheýildep jatyr. Qazaqstandyq óndirýshilerdiń otandyq shıkizatqa qol jetkizýi múmkin emestigi týraly shaǵymdary túsip jatyr», - dedi Memleket basshysy.
Prezıdenttiń málimeti boıynsha, taý-ken metalýrgıa salasyndaǵy iri kásiporyndar kezekti bólinistegi ónim jasaýdyń ornyna resýrstardy syrtqa shyǵaryp áketýdi jón kóredi.
«Qazaqstandyq qaıta óńdeý ónerkásibine qoljetimdi shıkizat qalaı da jetkiliksiz. Bul kabel, akýmýlátor, alúmını buıymdary sıaqty basqa da joǵary bólinistegi taýarlarǵa qatysty. Úkimetke ár ótinishti jiti qarap, qajet degen júıeli sharalar qabyldaý kerek», - dedi Qasym-Jomart Toqaev.
Aıta keteıik, osynaý saltanatty shara aıasynda úzdik dep tanylǵandarǵa «Qazaqstannyń úzdik taýary», «Qazaqstan Project Management Awards -2022», «TMD boıynsha sapa salasyndaǵy 2021 jyldyń syılyǵy» sıaqty kásipkerlik baǵyttaǵy marapattar da tabystaldy.
Sondaı-aq, «ArýAna», «Bıznes Kemeldilik», «İsker», «Uly dala eli» syılyqtarynyń jeńimpazdary da marapattaldy.
Bıyl «Altyn sapa» syılyǵyna 281 úmitker ótinim tapsyrǵan. Sarapshylar sonyń ishinen iri, orta jáne shaǵyn bıznes boıynsha 14 bıznes nysanyn 4 atalym negizinde iriktep aldy.