Prezıdent Qasym-Jomart Toqaev EQYU-nyń qazirgi tóraǵasy, Soltústik Makedonıa Respýblıkasynyń Syrtqy ister mınıstri Býıar Osmanıdi qabyldady, dep habarlaıdy almaty-akshamy.kz
Prezıdent Býıar Osmanıge iltıpat bildire otyryp, onyń EQYU-nyń qazirgi tóraǵasy retinde Qazaqstanǵa sapary mańyzdy ekenin atap ótti.
– Sizdiń saparyńyzdyń biz úshin mańyzy zor. Men elimizdiń osy uıymǵa múshe senimdi memleket retinde EQYU-ny qoldaıtynyn aıryqsha atap ótkim keledi. Uıymdaǵy pikirler qaıshylyǵyna qaramastan, EQYU – balamasy joq uıym . Sondyqtan biz onyń áleýetine qoldaý bildirýge kúsh salýymyz kerek. 2025 jyly Helsınkı qorytyndy aktisiniń 50 jyldyǵyn atap ótý aıasynda EQYU-nyń ózara dıalogqa arnalǵan biregeı platforma retinde qyzmetetýin jalǵastyrýyna qamtamasyz etý óte mańyzdy. Elimizdiń EQYU-men tyǵyz yntymaqtastyǵy, 2010 jylǵy Astana samıtiniń deklarasıasynda bekitilgendeı, qaýipsiz qoǵamdastyq qurý týraly ortaq kózqarasqa negizdeledi, – dedi Qasym-Jomart Toqaev.
Memleket basshysy Qazaqstan men Soltústik Makedonıa arasyndaǵy qarym-qatynasty nyǵaıtý perspektıvalaryna aıryqsha toqtaldy.
– Ekijaqty qarym-qatynasymyzda eshqandaı másele joq. Biz yntymaqtastyǵymyzdy keńeıtý turǵysynan eleýli nátıjege jettik. Elińizdi Qazaqstannyń Eýropadaǵy óte mańyzdy seriktesi retinde qarastyramyz jáne biz Skopede óz elshiligimizdi ashý jóninde sheshim qabyldadyq, – dedi Prezıdent.
Óz kezeginde Býıar Osmanı EQYU-nyń Qazaqstanmen jáne Ortalyq Azıa óńirimen ózara baılanysty damytýǵa zor mańyz artyp otyrǵanyn málimdedi. Onyń aıtýynsha, 2010 jyly Astanada ótken EQYU samıti Qazaqstannyń osy uıym qyzmetiniń negizgi baǵyttaryn qoldaýdaǵy belsendi rólin kórsetti.
– Soltústik Makedonıanyń uıym tóraǵasy retindegi urany – «Barlyǵy adamdar úshin». Bul bizdiń adamǵa baǵdarlanǵan ustanymymyzdy bildiredi. Sizdiń reformalar baǵdarlamańyz da adamdarǵa arnalǵan ári ol EQYU-nyń qaǵıdattary men mindettemelerimen ǵana emes, bizdiń uıym tóraǵalyǵyndaǵy basymdyqtarymyzben de úndes. Sonymen qatar biz Qazaqstannyń óńirlik, sondaı-aq halyqaralyq yntymaqtastyqty damytýdaǵy mańyzdy rólin atap ótkizimiz keledi, – dedi mınıstr.
Kezdesý sońynda Memleket basshysy Soltústik Makedonıa Prezıdenti Stevo Pendarovskııge izgi tilegin joldap, ony Qazaqstanǵa saparmen kelýge shaqyrdy.