Memleket basshysyna qańtar oqıǵasyn tergep-tekserý jumystarynyń barysy týraly baıandalǵan.
Sonymen qatar Prezıdentke shetelden aktıvterdi qaıtarý isi boıynsha qabyldanyp jatqan sharalar týraly málimet berildi, dep habarlaıdy Almaty-akshamy.kz Aqordanyń baspasóz qyzmetine silteme jasap.
Rezonans týdyrǵan qylmystyq ister boıynsha fıgýranttardyń qylmystyq jolmen jınaǵan kapıtalynyń shyǵyp ketýin anyqtaý maqsatynda olardyń shetelge jylystatylýyna taldaý jasalýda. Berik Asylov Qasym-Jomart Toqaevqa jýyrdaǵy Qazaqstan halqyna Joldaýynda bergen tapsyrmalarynyń júzege asyrylýy týraly aıtty.
Atap aıtqanda, Bas prokýrordyń Konstıtýsıalyq Sotqa júginý quqyǵy týraly Konstıtýsıanyń 83-babyna engiziletin túzetýler daıyndalýda, sondaı-aq «Prokýratýra týraly» jańa Konstıtýsıalyq zań ázirleý bastaldy. Salalyq zańnyń basty basymdyǵy – azamattardyń konstıtýsıalyq quqyqtary men bostandyqtaryn qorǵaý.
Zań jobasyna Adam quqyqtary jónindegi ýákilmen, quqyq qorǵaýshylarmen jáne azamattyq qoǵammen ózara is-qımyl jasaý, prokýrorlardyń derbestigi men jaýapkershiligin arttyrý tetigi týraly erejelerdi engizý josparlanyp otyr.
Budan bólek, Prezıdentke azaptaýlardy tergep-tekserý boıynsha prokýrorlarǵa ókilettik berýge, otbasy-turmystyq zorlyq-zombylyqtar úshin jaýapkershilikti kúsheıtýge qatysty tapsyrmalardyń oryndalýy týraly aıtyldy.
Qasym-Jomart Toqaev qadaǵalaý organynyń halyqpen ózara yqpaldastyǵyn jandandyrýdyń mańyzdy ekenin atap ótip, Bas prokýrorǵa birqatar tapsyrma berdi.