QR Prezıdenti Qasym-Jomart Toqaev ákimderdiń qyzmetine qatysty Jarlyqqa qol qoıdy. Qujatty Memleket basshysynyń tapsyrmasyn oryndaý maqsatynda Ulttyq ekonomıka mınıstrligi ázirledi, dep habarlaıdy Almaty-akshamy.kz.
Jańa Jarlyqta barlyq deńgeıdegi ákimderdiń vedimistik baǵynysty ákimshilik-aýmaqtyq birlikterge shyǵýynyń eń az sanyn belgileı otyryp, halyqpen turaqty kezdesýlerdiń ıkemdi kúntizbesine kóshýi kórinis tapty.
Óńirdiń negizgi áleýmettik-ekonomıkalyq kórsetkishteri týraly ákimniń baıandamasy kezdesý kezinde josparlanǵan ýaqyttyń tórtten bir bóliginen aspaıdy. Qalǵan ýaqyt «suraq-jaýap» formatynda ótkiziledi. Bul sharalar oblys basshylyǵynyń eldimeken turǵyndarymen barynsha baılanys jasaýyna yqpal ete otyryp, osylaısha halyqtyń bılikpen komýnıkasıasynyń sapasyn arttyrady.
Kezdesýlerdi uıymdastyrý kezinde múddeli tulǵalardyń, onyń ishinde máslıhat depýtattary, partıalar, qoǵamdyq uıymdar men opozısıa ókilderiniń keń aýdıtorıasy tartylady. Bul óńir basshylyǵymen jan-jaqty dıalog qurýǵa múmkindik beredi.
Kezdesý aıaqtalǵannan keıin ákimder azamattarǵa jeke qabyldaý ótkizedi. Problemalyq máseleler olardy qarjylandyrýdy máslıhat sesıasynda qaraý múmkindigimen júıelendiriledi.
Ákimderdiń jergilikti atqarýshy organdardyń, prokýratýra, ishki ister organdarynyń basshylyq quramymen jáne máslıhat depýtattarymen, qoǵamdyq keńesterdiń múshelerimen, jergilikti zıaly qaýymmen birlesip, azamattarǵa jeke qabyldaý ótkizýi Jarlyqtyń taǵy bir novelasy bolyp tabylady.
Osylaısha, Qazaqstan Respýblıkasynyń barlyq eldimekeni tıisti óńirdiń basshylyq quramymen kezdesýmen qamtamasyz etiledi. Buǵan qosa, kezdesýler halyqtyń talap etýi boıynsha jáne qajet bolǵan jaǵdaıda, kúntizbeden tys ótkizilýi múmkin.
Sonymen qatar barlyq deńgeıdegi ákimder halyq kótergen problemalyq máselelerdi sheshý barysy týraly aqparatty resmı ınternet-resýrstarda jáne «elektrondyq úkimet» veb-portalynda toqsan saıyn ornalastyrýy tıis.
Joǵaryda kórsetilgen sharalar halyqtyń ákimdermen qarym-qatynasyn jaqsartýǵa, azamattardyń jergilikti bılik organdaryna senimin, jergilikti atqarýshy organdardyń jaýapkershiligin arttyrýǵa, sondaı-aq óńirlerdegi áleýmettik shıelenisti tómendetýge múmkindik beredi.