Bıyl 20 myńnan astam jobany sýbsıdıalaý jáne 18 myńnan astam jobaǵa kepildik berý josparlanyp otyr
QR Premer-Mınıstriniń orynbasary – Qarjy mınıstri Erulan Jamaýbaev VII «ULTTYQ ONIM» otandyq óndirýshiler kórmesinde quttyqtaý sózin sóıledi, dep habarlaıdy Almaty-akshamy.kz.
Kórmeniń ashylýyna Almaty qalasynyń ákimi Erbolat Dosaev, «Báıterek» UBH» AQ basqarma tóraǵasy Qanat Sharlapaev, «Damý» kásipkerlikti damytý qory» AQ basqarma tóraǵasy Gaýhar Bóribaeva, QR Parlamentiniń depýtattary men bıznes ókilderi qatysty.
Óz sózinde E. Jamaýbaev Úkimettiń strategıalyq maqsaty ekonomıkadaǵy shaǵyn jáne orta bıznestiń úlesin 2030 jylǵa qaraı 40%-ǵa deıin ulǵaıtý ekenin atap ótti. Osyǵan baılanysty respýblıkada bıznes ashyp, ony júrgizý úshin barlyq qajetti jaǵdaı jasalyp jatyr. Ulttyq jobalar aıasynda paıyz mólsherlemeleri sýbsıdıalanyp, nesıe boıynsha kepildik jáne jeńildikpen qaryz beriledi, sondaı-aq basqa da qoldaý sharalary kórsetiledi.
Atap aıtqanda, mono-, shaǵyn qalalar men aýyldyq eldi mekenderde negizgi qaryz alýshyǵa 5% mólsherleme boıynsha jeńildikpen shaǵyn nesıe berý engizildi, al shaǵyn jáne orta bıznes nysandaryn memlekettik qoldaý sharalarymen aýqymdyraq qamtý úshin nesıe berýdiń eń joǵary somasy 7-den 3 mlrd teńgege deıin tómendetildi.
Sonymen qatar «Qarapaıym zattar ekonomıkasy» baǵdarlamasy júzege asyrylyp jatyr. Onyń aıasynda birqatar mańyzdy qyzmet túri boıynsha paıyz mólsherlemesin sýbsıdıalaý merzimi 5 jyldan 7 jylǵa deıin uzartyldy, al óńdeý ónerkásibin damytýdy keńeıtý maqsatynda memlekettik qoldaý kórsetý úshin qyzmet túrleriniń tizbesi 151-den 267-ge deıin kóbeıtildi.
Sonymen qatar «Bıznestiń jol kartasy» baǵdarlamasyn qarjylandyrý jylyna 224 mlrd teńgege deıin ulǵaıtyldy.
«Damý» qoryna keletin bolsaq, shaǵyn jáne orta bıznesti qoldaý aıasynda bıyl 20 myńnan astam jobany sýbsıdıalaý jáne 18 myńnan astam jobaǵa kepildik berý josparlanyp otyr. Jalpy «Damý» qorynyń quraldary arqyly el óńirleriniń barlyǵynda jalpy 11 trln teńgege jýyq nesıe somasyna kásipkerlerdiń 187,5 myńnan astam jobasyna qoldaý kórsetildi.
Jappaı kásipkerlikti qoldaý boıynsha basqa da sharalar qabyldanyp jatyr. Máselen, jańa retteýshilik saıasat engizilýde. Bıylǵy qańtar aıynan bastap Bızneske qoıylatyn mindetti talaptar tizilimi jarıalandy. Endi tizilimde joq talaptar boıynsha tekserý júrgizilmeıdi.
Sonymen qatar bıyl zańnamadan bızneske qoıylǵan 10 myń artyq talap alynbaq. Bul tekserý sanyn aıtarlyqtaı azaıtady. Osy oraıda jyl sońyna deıin táýekelderdi basqarý júıesin avtomattandyrý tolyq aıaqtalatyn bolady.
Oǵan qosa bıznes-qoǵamdastyqpen birlestikte jańa Salyq kodeksiniń jobasy boıynsha jumys júrip jatyr. Parlamentke bıznesti júrgizý úshin jaǵdaıdy jaqsartýǵa baǵyttalǵan zańnamalyq túzetýlerdiń 9-shy paketi engizildi.
«Úkimet pen bıznes arasynda júıeli jáne syndarly dıalog ornatyldy. Prezıdenttiń tapsyrmasy boıynsha qurylǵan bıznespen dıalog júrgizetin alań – “Otandyq kásipkerler keńesi” de joǵary tıimdilik kórsetýde», — dedi Erulan Jamaýbaev.