Erteń, ıaǵnı 7 tamyzda Almaty qalasy ákimdiginiń jáne Qazaqstan Respýblıkasynyń Cheh Respýblıkasyndaǵy Elshiligi, Praga qalasynyń merıasy jáne Praga qalasy mýzeıiniń qoldaýymen Almaty qalasy tarıhy mýzeıiniń «Ýaqyt kerýeni» atty halyqaralyq kórme ashylady.
Uıymdastyrýshy – Almaty qalasy mýzeıler birlestigi men Praga qalasy mýzeıi. 2024 jyly eki mýzeı arasynda yntymaqtastyq jónindegi memorandýmǵa qol qoıylǵan bolatyn.
Qazaqstan Respýblıkasy men Cheh Respýblıkasy arasyndaǵy dıplomatıalyq qatynastar 1993 jyly 1 qańtarda quryldy. Jyl ótken saıyn eki el arasyndaǵy mádenı baılanys nyǵaıyp keledi. Ashylǵaly otyrǵan kórme – osy yntymaqtastyqtyń naqty kórinisi.
Kórmeniń maqsaty – Qazaqstan Respýblıkasy men Cheh Respýblıkasy arasyndaǵy mádenı baılanystardy odan ári nyǵaıtý, sondaı-aq Uly dala halqynyń tarıhy men mádenıetimen – jalpy kóshpendiler mádenıetimen, atap aıtqanda kóshpeli qazaqtardyń dástúrlerimen, turmysymen, fılosofıasymen jáne dúnıetanymymen tanystyrý.
Almaty qalasy tarıhy mýzeıiniń «Ýaqyt kerýeni» kórmesi kelýshilerdi Uly Dalany mekendegen halyqtyń tereń tarıhy men mádenıetimen tanystyryp, eki el arasyndaǵy mádenı dıalogty jalǵastyrady. Kórmege Almaty qalasy mýzeıler birlestigi qorynan 220-dan astam eksponat qoıylady. Kórme qazaq halqynyń turmysyn, salt-dástúrin, qoldanbaly ónerin baıandaıtyn etnografıalyq jádigerler, mýzykalyq aspaptar men Almaty qalasynyń tarıhy men qazirgi ómirin kórsetetin fotosýretterge negizdelgen.
Almaty qalasy mýzeıler birlestigi Qazaqstannyń qoǵamdyq jáne mádenı ómirine belsendi qatysady. Onyń úlesinde 2022-2024 jyldary erekshe damyǵan halyqaralyq yntymaqtastyqtyń keń baǵdarlamasy bar. Máselen, buǵan deıin Seýl (Koreıa Respýblıkasy), Stambýl (Túrkıa), Neapol (Italıa) jáne Vena (Avstrıa) qalalarynda úlken jetistikpen ótkizilgen halyqaralyq kórmelerdi ataýǵa bolady.