Kólik salasynyń sarapshysy Rýslan Mýhomedárov Pýshkın kóshesinen Seıfýllın dańǵylyna deıingi jobany talqylaý barysynda qurylys jumystaryn osy kúzde emes, kelesi jyldyń sáýir aıynda bastaýdy usyndy. Sarapshynyń pikirinshe, bul kólik kollapsynan qutqarady.
«Bul joba kúzde kólik kollapsyn týdyrmaýy kerek. Qozǵalysqa kedergi keltirmeıtin jáne jol-kóshe jelisin taryltpaıtyn jumystardy birtindep bastaý kerek, olar qazir júrgizilýi tıis, al negizgi jumystar kelesi maýsymda bolýy kerek. Bul durys qabyldanǵan sheshim», - dedi sarapshy.
Sonymen qatar, ol qazirgi zamanǵy tehnologıa kez kelgen aýa raıynda jol jumystaryn júrgizýge múmkindik beretinine qaramastan, basty aspekt – jańa oqý jylynyń bastalýymen kólik sanynyń artýy ekenin atap ótti.
«Magıstraldy kóshede qoldan problema týǵyzý – bul durys emes. Adamdarǵa durys kózqaraspen qarap, saýatty jumys isteý qajet», - deıdi Rýslan Mýhomedárov.
Sol ýaqytta sarapshy Alına Bısembaeva jobany júzege asyrýǵa óte muqıat qaraýdyń mańyzdylyǵyn atap ótti.
«Qys mezgilinde jumys isteý áldeqaıda qıyn, sondyqtan jumysty azdap kúzde bastaýǵa bolady, biraq kóshe jelisine, ásirese jol jamylǵysyna tıispegen jón», - deıdi ol.
Jalpy, sarapshylar Raıymbek dańǵyly boıyndaǵy BRT dáliziniń birinshi ýchaskesiniń usynylǵan jobasyn joǵary baǵalap, onyń megapolıs turǵyndarynyń mobıldiligin arttyrý jáne qalalyq qoǵamdyq kólik júıesin damytý úshin mańyzdylyǵyn atap ótti.
Sarapshylar qaýymdastyǵynyń pikirin eskere otyryp jáne qala turǵyndary úshin qolaısyzdyqty barynsha azaıtý maqsatynda BRT jobasyn birneshe kezeńde júzege asyrý týraly sheshim qabyldandy. Mysaly, qurylys-montajdaý jumystaryn kelesi jyldyń sáýir aıynda bastaý kerek.
«Biz Raıymbek batyr dańǵyly – 70 myńnan astam kólik júretin úlken magıstraldiń biri ekenin jaqsy túsinemiz, sondyqtan bıyl kólik qozǵalysyna kedergi keltirmeıtin daıyndyq jumystaryn bastaımyz. Kelesi jyly jumystardy Ahrımenko kóshesi jaǵynan jáne Pýshkın kóshesi jaǵynan paraleldi ádispen bastaımyz», - dedi Almaty qalalyq mobıldilik basqarmasynyń basshysy Saǵyndyq Telibaev.