Forýmda Túrkıanyń TUSDER basqarma múshesi Bıhter Aııyldyz "PR ekonomıkalyq yntymaqtastyqtyń draıveri: bızneske arnalǵan múmkindikter" atty taqyrypta mazmundy baıandama jasap, memleketter men kompanıalar arasyndaǵy tıimdi komýnıkasıanyń qazirgi zamandaǵy sheshýshi róline toqtaldy. Onyń aıtýynsha, forýmǵa qatysý úlken qurmet, al óz elin halyqaralyq alańda tanystyrý kez kelgen maman úshin zor jaýapkershilik.
Spıker aldymen óziniń kásibı jolyn tanystyryp ótti. Fransıada óner tarıhy boıynsha bilim alǵan ol elge oralǵan soń bul salada emes, lúks ındýstrıasy men komýnıkasıa baǵytynda jumys isteı bastaǵan. 15 jyl boıy álemniń eń tanymal brendteri Tiffani, Omega sekildi kompanıalardyń Túrkıadaǵy PR jáne komýnıkasıa strategıalaryn júrgizgen. Keıingi 5 jarym jylda óz agenttiginiń negizin qalap, lúks brendterge keńes berý, turaqty damý strategıalaryn ázirleý jáne ózi basqaratyn FluMek medıa platformasynda kontent óndirisimen aınalysyp keledi.
Bıhter Aııyldyz óz baıandamasyn mádenıetimizdegi PR uǵymynyń tamyryn tarıhı turǵydan kórsetý arqyly bastaǵan. Onyń aıtýynsha, Osman ımperıasynda abyroıly jańalyqtardy jarıalaý dástúri alǵash ret resmı organdar arqyly emes, saraı qyzmetkerleriniń halyqqa jarıa túrde jetkizýimen bastalǵan. Alaıda bul júıe ýaqyt óte damyp, baspasózge ótý kezeńine jol ashqan. Spıker atap ótkendeı, Bosfor jaǵalaýyndaǵy áıgili tarıhı nysan Búıik Medjıdıe meshiti (Ortakóı meshiti) salynǵan dáýirde alǵash ret saraı habarlary gazetter arqyly jarıalana bastaǵan. Public relations uǵymynyń alǵashqy naqty qadamdaryn dál osy Abdúlmedjıd sultannyń dáýirimen baılanystyra alamyz," dedi ol.
Baıandamashy keıinirek qoǵammen baılanys, memlekettik komýnıkasıa jáne halyqaralyq ımıjdi qalyptastyrýdyń jańa kezeńine toqtaldy. Onyń aıtýynsha, Tanzımat reformalary memleket qurylymynda búrokratıanyń qalyptasýyna, al bul óz kezeginde qoǵamdyq komýnıkasıanyń jańa formatyn jasaýǵa múmkindik berdi. PR-dyń negizgi elementi qoǵam jáne onymen baılanys ornatatyn ınstıtýsıonaldyq júıe ekenin eskersek, bul tarıhı kezeńniń róli óte zor.
Spıker sondaı-aq Túrkıanyń qazirgi zamanǵy ulttyq beınesin tanytatyn mańyzdy nysandardyń biri Anytqabirdi mysalǵa alyp, memlekettiń halyqaralyq ımıjdi qalyptastyrýdaǵy strategıalyq qadamdaryn atap ótti. Onyń aıtýynsha, Tanzımat kezeńindegi alǵashqy PR elementterinen beri Túrkıa halyqaralyq arenada ózin tanytýda zamanaýı komýnıkasıa quraldaryn tıimdi paıdalanyp keledi, bul tájirıbe búginde bızneske de baǵyt-baǵdar kórsetedi.
Bıhter Aıyldyz PR-dyń memleketaralyq ekonomıkalyq yntymaqtastyqtaǵy rólin erekshe atap ótti. Komýnıkasıanyń sapasy bıznes ortasyna, ınvestısıalyq klımatqa, brendterdiń jahandyq naryqtaǵy pozısıasyna tikeleı áser etedi.
"Qazirgi álemde tıimdi PR tek ımıj qalyptastyrý tetigi ǵana emes, ekonomıkalyq baılanystardy nyǵaıtatyn negizgi draıver. Durys komýnıkasıa strategıasy jańa seriktestikke, jańa naryqtarǵa jol ashady", - dedi ol.